Sunan Al Daraqutni: Hadith 314

حضرت رفاعہ بن رافع (رض) کے حوالے سے یہ بات منقول ہے : حضرت رفاعہ (رض) اور حضرت مالک بن رافع (رض) یہ دونوں بھائی ہیں اور غزوہ بدر میں شریک ہوئے ہیں۔ حضرت رافع (رض) بیان کرتے ہیں : ایک مرتبہ ہم نبی اکرم (صلی اللہ علیہ وآلہ وسلم) کے پاس بیٹھے ہوئے تھے (راوی کو شک ہے شاید یہ الفاظ ہیں :) ایک مرتبہ نبی اکرم (صلی اللہ علیہ وآلہ وسلم) تشریف فرما تھے، ہم آپ کے ارد گرد موجود تھے، اسی دوران ایک شخص وہاں آیا۔ اس نے قبلے کی طرف رخ کرکے نماز ادا کی ، جب اس نے نماز مکمل کرلی تو آکر اس نے نبی اکرم (صلی اللہ علیہ وآلہ وسلم) کو سلام کیا اور حاضرین کو بھی سلام کیا۔ نبی اکرم (صلی اللہ علیہ وآلہ وسلم) نے اس سے فرمایا : تم پر لازم ہے، تم واپس جاؤ اور جاکر نماز ادا کرو، کیونکہ تم نے درحقیقت نماز ادا نہیں کی، اس شخص نے پھر نماز ادا کرنا شروع کی، ہم اس کی نماز کا غور سے جائزہ لیتے رہے، ہمیں سمجھ نہیں آئی کہ اس نے کیا غلطی کی ہے ؟ جب اس نے نماز ادا کرلی تو وہ آیا اور نبی اکرم (صلی اللہ علیہ وآلہ وسلم) اور حاضرین کو سلام کیا۔ نبی اکرم (صلی اللہ علیہ وآلہ وسلم) نے اس سے فرمایا : تم پر لازم ہے ، تم جاؤ اور جاکر دوبارہ نماز ادا کرو، تم نے درحقیقت نماز ادا نہیں کی۔
ہمام نامی راوی بیان کرتے ہیں : مجھے یہ پتہ نہیں ہے، حدیث میں کیا مذکور ہے، نبی اکرم (صلی اللہ علیہ وآلہ وسلم) نے اسے دو مرتبہ اس بات کی ہدایت کی یا تین مرتبہ ہدایت کی، پھر اس شخص نے عرض کی : میں نے کیا کمی کی ہے ؟ مجھے یہ نہیں پتہ چل سکا کہ آپ میری نماز کے کس حصے کو غلط قرار دے رہے ہیں ؟ تو نبی اکرم (صلی اللہ علیہ وآلہ وسلم) نے ارشاد فرمایا : کسی بھی شخص کی نماز اس وقت تک مکمل نہیں ہوتی، جب تک وہ اچھی طرح سے اسی طرح وضو نہیں کرلیتا جیسے اللہ تعالیٰ نے اسے حکم دیا ہے، آدمی پہلے اپنے چہرے کو دھوئے، پھر دونوں بازؤ وں کو کہنیوں تک دھوئے، پھر اپنے سر کا مسح کرے، دونوں پاؤں ٹخنوں تک دھوئے، اللہ تعالیٰ کی کبریائی کا ذکر کرے، اس کی ثناء بیان کرے، پھر سورة فاتحہ پڑھے پھر جو اس کے نصیب میں ہوا، اسے آسان لگے (قرآن کے کچھ حصے) کی تلاوت کرے، پھر تکبیر کہے اور رکوع میں جائے، اور اپنے دونوں ہاتھ گھٹنوں پر رکھے، یہاں تک کہ اس کے جوڑ مطمئن ہوجائیں اور کشادہ رہیں ، پھر وہ ” سمع اللہ لمن حمدہ “ پڑھے اور سیدھا کھڑا ہوجائے، یہاں تک کہ اس کی پشت سیدھی ہوجائے، اور ہر ہڈی اپنی جگہ پر آجائے، پھر وہ تکبیر کہہ کر سجدے میں چلا جائے، اور اپنی پیشانی کو جما کر رکھے۔
ہمام نامی راوی نے یہاں بعض اوقات یہ لفظ نقل کیے ہیں : اپنی پیشانی زمین پر رکھے ، یہاں تک کہ اس کے جوڑ اطمینان کی حالت میں آجائیں اور کشادہ ہوجائیں، پھر وہ تکبیر کہتے ہوئے اپنی سرین کے بل بیٹھ جائے، اور اپنی پشت کو سیدھا رکھے۔
اس کے بعد انھوں نے چاروں رکعات میں نماز کے طریقے کو اسی طرح بیان کیا، یہاں تک کہ اسے مکمل بیان کردیا اور (نبی اکرم (صلی اللہ علیہ وآلہ وسلم) نے) یہ ارشاد فرمایا : ” کسی بھی شخص کی نماز اس وقت تک مکمل نہیں ہوتی جب تک وہ ایسا نہ کرے “۔