Sunan Al Daraqutni: Hadith 3210

3210 ۔ ابواحوص بیان کرتے ہیں : جنگ نہروان کے دن ہم لوگ نہر کے ایک طرف حضرت علی بن ابوطالب (رض) کے ساتھ موجود تھے ، اسی دوران خارجی آئے اور انھوں نے نہر کے دوسری طرف پڑاؤ کیا، حضرت علی (رض) نے فرمایا : تم نے انھیں متحرک نہیں کرنا جب تک وہ خود کوئی غلطی نہ کریں، وہ لوگ عبداللہ بن خباب کے پاس آئے اور بولے آپ ہمیں کوئی ایسی حدیث سنائیں جو آپ کے والد نے آپ کو سنائی ہو، جو انھوں نے نبی کریم (صلی اللہ علیہ وآلہ وسلم) کی زبانی سنی ہو تو عبداللہ بن خباب نے بتایا میرے والد نے مجھے یہ حدیث سنائی ہے انھوں نے نبی کریم (صلی اللہ علیہ وآلہ وسلم) کو یہ ارشاد فرماتے ہوئے سنا ہے : ایسا فتنہ آئے گا جس میں بیٹھا ہواشخص کھڑے ہوئے سے بہتر ہوگا اور کھڑا ہواشخص دوڑنے والے سے بہتر ہوگا۔ (راوی بیان کرتے ہیں ) وہ لوگ (یعنی خارجی لوگ) انھیں (یعنی عبداللہ بن خباب کو) دریا کے کنارے لے گئے اور انھیں اس طرح ذبح کردیا جس طرح بکری کو ذبح کیا جاتا ہے اس کی اطلاع حضرت علی (رض) کو ملی تو انھوں نے اللہ کہا اور فرمایا انھیں بلند آواز میں پکارو یہ کہو کہ وہ عبداللہ بن خباب کے قاتل کو ہماری طرف بھیج دیں تو ان لوگوں نے جواب میں تین مرتبہ یہ کہا : ہم سب نے انھیں قتل کیا ہے تو حضرت علی (رض) نے اپنے ساتھیوں سے فرمایا : اب ان پر حملہ کردو۔
راوی بیان کرتے ہیں : اس کے بعد حضرت علی (رض) اور ان کے ساتھیوں نے ان لوگوں کو قتل کردیا۔ راوی بیان کرتے ہیں اس کے بعد (روایت نقل کرنے والے نے ) باقی روایت نقل کی ہے۔