Sunan Al Daraqutni: Hadith 3840

3841 ۔ حضرت عبداللہ بن عمر (رض) بیان کرتے ہیں : ایک شخص حضرت عمر (رض) کی خدمت میں حاضر ہوا اور بولا میں نے اپنی بیوی کو اس وقت طلاق دی جب وہ حیض کی حالت میں تھی۔
ابن صاعد نامی راوی بیان کرتے ہیں : ایک شخص نے حضرت عمر (رض) سے کہا میں نے اپنی بیوی کو اس وقت طلاق بتہ دی جب وہ حیض کی حالت میں تھی۔
اس کے بعد دونوں راویوں نے یہ الفاظ نقل کیے ہیں۔ حضرت عمر (رض) نے فرمایا تم نے اپنے پروردگار کی نافرمانی کی ہے اور تمہاری بیوی تم سے الگ ہوچکی ہے۔ وہ شخص بولا، جب حضرت ابن عمر (رض) نے اپنی بیوی سے علیحدگی اختیار کی تھی اس وقت نبی کریم (صلی اللہ علیہ وآلہ وسلم) نے تو نہیں یہ ہدایت کی کہ وہ اپنی بیوی سے رجوع کرلے۔
ابن صاعد نامی راوی نے یہ الفاظ نقل کیے ہیں : جب عبداللہ بن عمر (رض) نے اپنی بیوی سے اس کے حیض کے دوران علیحدگی اختیار کی تھی (یعنی اسے طلاق دی تھی) تو نبی کریم نے ان سے یہ فرمایا تھا وہ اس عورت سے رجوع کرلیں۔
اس کے بعد دونوں راویوں نے یہ الفاظ نقل کیے ہیں : حضرت عمر (رض) نے اس شخص سے فرمایا : نبی کریم (صلی اللہ علیہ وآلہ وسلم) نے اسے (یعنی ابن عمر (رض)) کو اپنی بیوی کے ساتھ رجوع کرنے کی ہدایت اس طلاق کی وجہ سے کی تھی جو باقی رہ گئی تھی (یعنی جسے دینے کا حضرت ابن عمر (رض) کو ابھی اختیار تھا) ۔
ابن صاعد نامی راوی نے یہ الفاظ نقل کیے ہیں : اس نے اس طلاق کی بنیاد پر رجوع کیا تھا، جس کا اسے حق باقی تھا، اور تم نے اس چیز کو باقی نہیں رہنے دیا، جس کی بنیاد پر تم اپنی بیوی سے رجوع کرسکے ۔
ابن منیع نامی راوی نے یہ الفاظ نقل کیے ہیں : تمہارے لیے وہ چیز باقی نہیں رہی جس کی بنیاد پر تم اپنی بیوی سے رجوع کرسکو۔
شیخ ابوالقاسم نے ہمارے سامنے یہ بات بیان کی ہے : اس روایت کو کئی راویوں نے نقل کیا ہے : لیکن انھوں نے اس میں حضرت عمر (رض) کے ان الفاظ کا تذکرہ نہیں کیا، میرے علم کے مطابق سعید بن عبدالرحمن کے علاوہ اور کسی بھی راوی نے یہ کلام نقل نہیں کیا۔