Sunan Al Daraqutni: Hadith 4333

4333 ۔ حضرت عبداللہ بن عمر (رض) بیان کرتے ہیں کہ حضرت عمربن خطاب (رض) کو خیبر میں ایک زمین ملی ‘ وہ نبی اکرم (صلی اللہ علیہ وآلہ وسلم) کی خدمت میں حاضر ہوئے تاکہ اس کے بارے میں آپ سے مشورہ کریں تو انھوں نے عرض کی : یارسول اللہ ! مجھے خیبر میں زمین ملی ہے ‘ میرے نزدیک مجھے اس سے زیادہ بہترین زمین کبھی نہیں ملی ‘ آپ اس کے بارے میں مجھے کیا حکم کرتے ہیں ؟ نبی اکرم (صلی اللہ علیہ وآلہ وسلم) نے ارشاد فرمایا : اگر تم چاہوتوزمین کو اپنے پاس رہنے دو اور اس کے پھل کو صدقہ کردو۔
راوی کہتے ہیں : تو حضرت عمر (رض) نے اسے اس طرح صدقہ کیا کہ اصل زمین کو نہ فروخت کیا جاسکتا ہے ‘ نہ ہبہ کیا جاسکتا ہے ‘ نہ وراثت میں تقسیم کیا جاسکتا ہے اور اس کا پھل غریبوں ‘ قریبی رشتے داروں ‘ غلاموں ‘ مجاہدین ‘ مسافروں اور مہمانوں کے لیے صدقہ تھا۔ اور جو شخص اس کا نگران تھا اس کو کوئی گناہ نہ ہوتا اگر وہ خود اس میں سے مناسب طریقے سے کھالیتا یا اپنے کسی دوست کو کھلادیتاجب کہ وہ مال جمع کرنے والانہ ہو۔