Sunan Al Daraqutni: Hadith 4362

4362 ۔ حضرت ابوسلمہ بن عبدالرحمن بیان کرتے ہیں کہ جب حضرت عثمان غنی (رض) کو ان کے گھر میں محصور کردیا گیا تو انھوں نے لوگوں کی طرف جھانک کر دیکھا اور لوگوں کو قسم دی ‘ وہ بولے : کیا تم لوگ یہ بات جانتے ہو کہ میں حراپہاڑ کے اوپر نبی اکرم (صلی اللہ علیہ وآلہ وسلم) کے ساتھ تھا ‘ وہ حرکت میں آنے لگا تو نبی اکرم (صلی اللہ علیہ وآلہ وسلم) نے فرمایا : حرا اپنی جگہ پر رہو ‘ تمہارے اوپر ایک نبی ‘ ایک صدیق اور ایک شہیدموجود ہے۔
راوی کہتے ہیں کہ لوگوں نے ان کی اس بات کی تصدیق کی ‘ پھر حضرت عثمان غنی (رض) نے فرمایا : کیا تم لوگ یہ بات جانتے ہو کہ نبی اکرم (صلی اللہ علیہ وآلہ وسلم) نے یہ بات ارشاد فرمائی تھی : کون شخص مسجد میں گھرکا اضافہ کرے گا ‘ تو میں نے ایک گھرخریدا اور اس کے ذریعے مسجد میں توسیع کروادی تو لوگوں نے ان کی بات کی تصدیق کی ‘ پھر حضرت عثمان غنی (رض) نے فرمایا : میں تم لوگوں کو اللہ کے نام کی قسم دے کر دریافت کرتا ہوں کہ کیا آپ لوگ یہ بات جانتے ہیں کہ رومہ کنوئیں کا پانی صرف مسافروں کو فروخت کیا جاتا تھا ‘ میں نے اس کنوئیں کو خریدا اور اسے اللہ کے نام پر وقف کردیا۔ لوگوں نے جواب دیا : جی ہاں ! لوگوں نے ان کی اس بات کی تصدیق کی ‘ پھر حضرت عثمان غنی (رض) نے فرمایا : میں آپ لوگوں کو اللہ کے نام کی قسم دے کر دریافت کرتا ہوں ! کیا آپ لوگ یہ بات جانتے ہیں کہ میں نے غزوہ تبوک کے لیے سامان فراہم کیا تھا اور میں نے اس پر اتنی ‘ اتنی رقم خرچ کی تھی تو لوگوں نے اس بات کی بھی تصدیق کی تھی ‘ پھر حضرت عثمان غنی (رض) نے فرمایا : میں اتنا عرصہ تمہارے درمیان رہاہوں لیکن تم نے میرے بارے میں جلدی بازی کا مظاہرہ کیا ہے کہ اللہ تعالیٰ نے جو خلعت مجھے پہنائی ہے میں اسے اتاردوں۔ اللہ کی قسم ! یہ کبھی نہیں ہوگا۔