1023 ۔ ابوبکر بن موسیٰ اپنے والد کے حوالے سے نبی کریم (صلی اللہ علیہ وآلہ وسلم) کا یہ واقعہ نقل کرتے ہیں : ایک شخص آپ کی خدمت میں حاضر ہوا اور آپ سے نمازوں کے اوقات کے بارے یں سوال کیا نبی کریم (صلی اللہ علیہ وآلہ وسلم) نے اسے کوئی جواب نہیں دیا، آپ نے حضرت بلال کو ہدایت کی تو انھوں نے فجر کی نماز کے لیے اس وقت اقامت کہی جب صبح صادق ہوچکی تھی، اور اس وقت کوئی شخص اندھیرے کی وجہ سے ایک دوسرے کو پہچان نہیں سکتا تھا۔ پھر نبی کریم (صلی اللہ علیہ وآلہ وسلم) کے حکم کے تحت انھوں نے ظہر کی نماز کے لیے اس وقت اقامت کہی جب سورج ڈھل چکا تھا، اور آدمی یہ اندازہ لگاتا تھا کہ نصف النہار ہوچکا ہے ، یا نہیں ہوا ہے۔ ویسے نبی کریم (صلی اللہ علیہ وآلہ وسلم) کو اس کے بارے میں زیادہ علم تھا، پھر نبی کریم (صلی اللہ علیہ وآلہ وسلم) کے حکم کے تحت انھوں نے عصر کی نماز کے لیے اس وقت اقامت کہی جب سورج بلند ہوچکا تھا، پھر نبی کریم (صلی اللہ علیہ وآلہ وسلم) کے حکم کے تحت انھوں نے مغرب کی نماز کے لیے اس وقت اقامت کہی جب سورج غروب ہوچکا تھا، پھر نبی کریم (صلی اللہ علیہ وآلہ وسلم) کے حکم کے تحت انھوں نے عشاء کی نماز کے لیے اس وقت اقامت کہی جب شفق غروب ہوچکی تھی ۔
پھر اگلے دن نبی کریم (صلی اللہ علیہ وآلہ وسلم) نے فجر کی نماز کو تاخیر سے ادا کیا، جب آپ نماز پڑھ کر فارغ ہوئے تو آدمی یہ کہہ سکتا تھا کہ سورج طلوع ہوچکا ہے یا ہونے والا ہے ، پھر نبی کریم (صلی اللہ علیہ وآلہ وسلم) نے ظہر کی نماز کا تاخیر سے ادا کیا یہاں تک کہ اسے پہلے دن کی عصر کی نماز کے قریب میں ادا کیا، پھر نبی کریم (صلی اللہ علیہ وآلہ وسلم) نے عصر کی نماز کو تاخیر سے ادا کیا جب آپ لوگ نماز پڑھ کر فارغ ہوئے تو آدمی یہ کہہ سکتا تھا، سورج سرخ ہوچکا ہے (یعنی دھوپ ماند پڑچکی ہے) پھر نبی کریم (صلی اللہ علیہ وآلہ وسلم) نے مغرب کی نماز کو تاخیر سے ادا کیا یہاں تک کہ وہ شفق غروب ہونے سے کچھ دیر پہلے ادا کی پھر نبی کریم (صلی اللہ علیہ وآلہ وسلم) نے عشاء کی نماز کو اتنی تاخیر سے ادا کیا ایک تہائی رات گزرچکی تھی اگلے دن صبح نبی کریم (صلی اللہ علیہ وآلہ وسلم) نے سوال کرنے والے شخص کو بلوایا اور فرمایا : ان دونوں کے درمیان (ان نمازوں کا) وقت ہے۔