1024 ۔ ابوبکر بن ابوموسی اپنے والد حضرت ابوموسی اشعری (رض) کا یہ بیان نقل کرتے ہیں : ایک شخص نبی کریم (صلی اللہ علیہ وآلہ وسلم) کی خدمت میں حاضر ہوا اور آپ (صلی اللہ علیہ وآلہ وسلم) سے نمازوں کے بارے میں دریافت کیا تواپ نے اسے کوئی جواب نہیں دیا، نبی کریم (صلی اللہ علیہ وآلہ وسلم) نے حضرت بلال (رض) کو ہدایت کی تو انھوں نے صبح کی نماز کے لیے اقامت کہی جب صبح صادق ہوچکی تھی، نبی کریم (صلی اللہ علیہ وآلہ وسلم) نے وہ نماز ادا کی پھر نبی کے حکم کے تحت انھوں نے ظہر کی نماز کے لیے اس وقت اقامت کہی جب آدمی یہ سوچتا ہے کہ سورج ڈھل چکا ہے یا ابھی نہیں ڈھلا، ویسے نبی کریم (صلی اللہ علیہ وآلہ وسلم) کو اس کے بارے میں زیادہ علم ہے ، پھر نبی کریم (صلی اللہ علیہ وآلہ وسلم) کے حکم کے تحت انھوں نے عصر کی نماز کے لیے اقامت کہی اس وقت جب سورج ابھی بلند تھا، پھر نبی کریم (صلی اللہ علیہ وآلہ وسلم) کے حکم کے تحت مغرب کی نماز کے لیے اس وقت اقامت کہی جب سورج غروب ہوچکا تھا، پھر نبی کریم (صلی اللہ علیہ وآلہ وسلم) کے حکم کے تحت عشاء کی نماز کے لیے اس وقت اقامت کہی جب شفق غروب ہوچکی تھی۔
راوی بیان کرتے ہیں : اگلے دن نبی کریم (صلی اللہ علیہ وآلہ وسلم) نے فجر کی نماز اس وقت ادا کی جب آدمی یہ سوچتا تھا کہ سورج نکل آیا ہے یا ابھی نہیں نکلا، ویسے نبی کریم (صلی اللہ علیہ وآلہ وسلم) کو اس بارے میں زیادہ پتا تھا، پھر نبی کریم (صلی اللہ علیہ وآلہ وسلم) نے ظہر کی نماز اس وقت ادا کی جس وقت میں آپ (صلی اللہ علیہ وآلہ وسلم) نے پہلے دن میں عصر کی نماز ادا کی تھی جب اپ نے عصر کی نماز ادا کی تو آدمی یہ سوچتا ہے کہ سورج توسرخ ہوچکا ہے، یعنی دھوپ ماند پڑگئی ہے ) پھر نبی کریم (صلی اللہ علیہ وآلہ وسلم) نے مغرب کی نماز شفق غروب ہونے سے کچھ دیر پہلے ادا کی پھر عشاء کی نماز آپ نے ایک تہائی رات گزرجانے کے بعد ادا کی پھر آپ نے دریافت کیا، سوال کرنے والاشخص کہاں ہے ؟ ان دونوں وقتوں کے درمیان (نمازوں کا مخصوص) وقت ہے۔