1118 ۔ حضرت عبداللہ بن مسعود (رض) بیان کرتے ہیں : میں نے نبی کریم (صلی اللہ علیہ وآلہ وسلم) کی اقتداء میں ، حضرت ابوبکر (رض) کی اقتداء میں اور حضرت عمر (رض) کی اقتداء میں نمازیں ادا کی ہیں ، یہ حضرات صرف نماز کے آغاز میں پہلی تکبیر کے ساتھ رفع یدین کیا کرتے تھے۔
اسحق نامی راوی نے یہ بات بیان کی ہے : ہم نماز پڑھنے کے طریقے کے بارے میں اس روایت کو اختیار کریں گے۔ اس روایت کو نقل کرنے میں محمد بن جابر نامی راوی منفرد ہیں اور یہ صاحب ضعیف ہیں ، محمد بن جابر نے اسے حماد نامی راوی کے حوالے سے ابراہیم نخعی سے نقل کیا ہے ، جبکہ حماد کے علاوہ دیگر راویوں نے اسے ابراہیم نخعی سے مرسل روایت کے طور پر حضرت عبداللہ بن مسعود (رض) سے ان کے اپنے فعل کے طور پر نقل کیا ہے انھوں نے اسے مرفوع حدیث کے طور پر نقل نہیں کیا، جو نبی کریم (صلی اللہ علیہ وآلہ وسلم) کے بارے میں منقول ہو اور یہی روایت درست ہے۔