1321 ۔ یہی روایت بعض دیگراسناد کے ہمراہ بھی منقول ہے جس میں یہ الفاظ ہیں : قاسم نامی راوی بیان کرتے ہیں : علقمہ نے میرا ہاتھ تھاما اور (روایت میں یہ الفاظ بھی ہیں) حضرت عبداللہ بن مسعود (رض) نے علقمہ کا ہاتھ تھاما اور نبی کریم (صلی اللہ علیہ وآلہ وسلم) نے حضرت عبداللہ بن مسعود (رض) کا ہاتھ تھاما اور تشہد کے کلمات کی تعلیم دی تھی (جو یہ ہیں) ۔
'' تمام قولی اور بدنی عبادتیں اللہ کے لیے مخصوص ہیں اے نبی ! آپ پر سلام ہو اور اللہ کی رحمتیں اور برکتیں نازل ہوں اور ہم پرا اور اللہ کے تمام نیک بندوں پر سلام ہو، میں اس بات کی گواہی دیتاہوں کہ اللہ کے علاوہ کوئی معبود نہیں ہے اور میں اس بات کی گواہی دیتاہوں کہ حضرت محمد (صلی اللہ علیہ وآلہ وسلم) اس کے بندے اور رسول ہیں۔ ''
پھر حضرت عبداللہ بن مسعود (رض) نے یہ ارشاد فرمایا : جب تم اس سے فارغ ہوجاؤ گے تو تم نماز سے فارغ ہوجاؤ گے اب تم چاہو تو بیٹھے رہو اور اگر چاہو تواٹھ جاؤ۔