1322 ۔ مجاہد بیان کرتے ہیں : ابن ابی لیلی (راوی کو شک ہے شاید یہ الفاظ ہیں) ابومعمر نے یہ بات بیان کی ہے ، حضرت عبداللہ بن مسعود (رض) نے مجھے تشہد کے کلمات سکھائے اور یہ بات بیان کی کہ یہ کلمات مجھے نبی کریم (صلی اللہ علیہ وآلہ وسلم) نے اسی طرح سکھائے تھے جس طرح آپ (صلی اللہ علیہ وآلہ وسلم) ہم لوگوں کو قرآن کی کسی سورت کی تعلیم دیا کرتے تھے (وہ کلمات یہ ہیں):
'' تمام پاکیزہ اور جسمانی اور قولی عبادتیں اللہ کے لیے مخصوص ہیں اے نبی ! آپ پر سلام ہو اور اللہ کی رحمتیں اور برکتیں نازل ہوں اور ہم پرا اور اللہ کے تمام نیک بندوں پر سلام ہو، میں اس بات کی گواہی دیتاہوں کہ اللہ کے علاوہ کوئی معبود نہیں ہے اور میں اس بات کی گواہی دیتاہوں کہ حضرت محمد (صلی اللہ علیہ وآلہ وسلم) اس کے بندے اور رسول ہیں۔ اے اللہ ! تو حضرت محمد (صلی اللہ علیہ وآلہ وسلم) پر درود نازل کر اور ان کے اہل بیت پر بھی جس طرح تو نے حضرت ابراہیم پر درود نازل کیا بیشک تولائق حمد اور بزرگی کا مالک ہے۔ اے اللہ تو ان کے ساتھ ہم پر بھی درود نازل کر، اے اللہ تو حضرت محمد (صلی اللہ علیہ وآلہ وسلم) اور ان کے اہل بیت پر برکتیں نازل کر جس تو نے حضرت ابراہیم پر برکتیں نازل کیں، بیشک تولائق حمد اور بزرگی کا مالک ہے اے اللہ ان کے ساتھ ہم پر بھی برکتیں نازل کر، اللہ کا درود اہل ایمان کا درود حضرت محمد (صلی اللہ علیہ وآلہ وسلم) پر نازل ہو جو نبی ہیں امی ہیں آپ (صلی اللہ علیہ وآلہ وسلم) پر سلام ہو اللہ کی رحمتیں اور اس کی برکتیں نازل ہوں۔
مجاہد فرماتے ہیں جب انسان سلام بھیجتے ہوئے یہ الفاظ استعمال کرے ، اور اللہ کے تمام نیک بندوں پر سلام ہو تو اس نے آسمان اور زمین میں بسنے والے تمام لوگوں پر سلام بھیج دیا ہے۔
عبدالوہاب بن مجاہد نامی راوی ضعیف ہے۔