1722 نافع ‘ حضرت عبداللہ بن عمر (رض) کے حوالے میں یہ بات نقل کرتے ہیں لوگ (یعنی صحابہ کرام) قربانی کے دن ظہر کی نماز کے بعد تکبیر کہنا شروع کرتے تھے اور ایام تشریق کے آخری دن ظہر کی نماز تک تکبیر کہا کرتے تھے ‘ یہ لوگ صبح کی نماز میں تکبیر کہتے تھے اور ظہر کی نماز میں نہیں کہتے تھے۔
عبداللہ نامی راوی اپنے والد کے حوالے سے یہ بات نقل کرتے ہیں جب حضرت عثمان غنی (رض) محصور تھے تو انھوں نے ہمارے سامنے قربانی کے دن ظہر کی نماز سے تکبیر کہنی شروع کی اور ایام تشریق کے آخری دن ظہر کی نماز ادا کرنے تک انھوں نے تکبیر کہی (ایام تشریق کے آخری دن) انھوں نے صبح کی نماز میں تکبیر کہی تھی ظہر کی نماز میں نہیں کہی۔
عبداللہ نامی راوی حضرت عمر اور حضرت عثمان غنی (رض) کے بارے میں یہ بات نقل کرتے ہیں یہ دونوں حضرات واپسی کے دن دادی محصب میں ظہر کی نماز ادا کرتے تھے اور اس کے بعد تکبیر نہیں کہتے تھے۔
حضرت جابربن عبداللہ (رض) کے بارے میں یہ بات منقول ہے وہ ایام تشریق میں تمام نمازوں کے بعد تکبیر کہا کرتے تھے ‘ وہ تین مرتبہ اللہ اکبر پڑھا کرتے تھے۔
یہی روایت ایک اور سند کے ہمراہ حضرت عبداللہ بن عباس (رض) سے منقول ہے۔