1961 ابن شہاب بیان کرتے ہیں یہ نبی اکرم (صلی اللہ علیہ وآلہ وسلم) کے خط کا نسخہ ہے ‘ جو آپ (صلی اللہ علیہ وآلہ وسلم) نے زکوۃ کے بارے میں تحریر کیا تھا ابن شہاب بیان کرتے ہیں سالم بن عبداللہ بن عمرنے یہ مجھے پڑھ کر سنا یا اور میں نے اسے اسی طرح محفوظ کرلیا ‘ یہ وہی نسخہ ہے جس کی ایک نقل عمربن عبدالعزیز نے عبداللہ بن عمر اور سالم بن عبداللہ سے لی تھی ‘ جب انھیں مدینہ منورہ کا گورنرمقرر کیا گیا تھا۔
عمربن عبدالعزیزنے اپنے سرکاری اہلکاروں کو اس پر عمل کرنے کا حکم دیا تھا اور یہی لکھ کرولید بن عبدالملک کے پاس بھیج دیا تھا ‘ ولید نے بھی اپنے اہلکاروں کو اس پر عمل کرنے کا حکم دیا تھا ‘ اس کے بعد خلفاء اس کے مطابق حکم دیتے رہتے ہیں ‘ پھر ہشام بن ہانی کے حکم کے تحت اس کی نقل ہر مسلمان اہلکار تک پہنچادی گئی ‘ اس نے اس پر موجود احکام پر عمل کرنے کا حکم بھی دیا اور یہ ہدایت کی کہ وہ اس سے تجاوزنہ کریں۔
یہ تحریر اس کی وضاحت کرتی ہے
” اونٹ میں زکوۃ کی ادائیگی اس وقت لازم ہوگی جب ان کی تعداد پانچ ہوجائے ‘ جب وہ پانچ ہوجائیں گے تو ان پر ایک بکری کی ادائیگی لازم ہوگی ‘ یہاں تک کہ وہ دس ہوجائیں جب وہ دس ہوجائیں گے تو ان پر دوبکریوں کی ادائیگی لازم ہوگی ‘ جب وہ پندرہ ہوجائیں گے تو ان میں تین بکریوں کی ادائیگی لازم ہوگی ‘ یہاں تک کہ ان کی تعداد بیس ہوجائے اور جب وہ بیس ہوجائیں گے تو ان پرچاربکریوں کی ادائیگی لازم ہوگی یہاں تک کہ وہ ٢٥ ہوجائیں ‘ جب وہ ٢٥ ہوجائیں گے تو ان میں ایک بنت مخاض کی ادائیگی لازم ہوجائے گی ‘ اگر بنت مخاض نہ مل سکے تو مذکر ابن لبون کی ادائیگی لازم ہوگی یہاں تک کہ ان کی تعداد ٣٥ ہوجائے۔
جب ان کی تعداد ٣٦۔ ٤٥ تک ہو ‘ تو ان کے اندر ایک بنت لبون کی ادائیگی لازم ہوگی ‘ ٤٦۔ ٦٠ تک ان میں ایک حقہ کی ادائیگی لازم ہوگی جسے جفتی کے لیے دیا جاسکے ‘ ٦١۔ ٧٥ تک میں اسے ایک جذعہ کی ادائیگی لازم ہوگی ‘ ٧٦۔ ٩٠ تک میں دوبنت لبون کی ادائیگی لازم ہوگی ‘ ٩١۔ ١٢٠ تک میں دوحقہ کی ادائیگی لازم ہوگی ‘ جسے جفتی کے لیے دیا جاسکے۔
١٢١۔ ١٢٩ تک میں تین بنت لبون کی ادائیگی لازم ہوگی ‘ ١٣٠۔ ١٣٥ تک میں یاک حقہ اور دوبنت لبون کی ادائیگی لازم ہوگی ١٤٠ تک میں دوحقہ اور ایک بنت لبون کی ادائیگی لازم ہوگی ‘ یہاں تک کہ ان کی تعداد ١٤٩ ہوجائے ‘ جب ان کی تعداد ١٥٠ ہوجائے تو ان میں تین حقہ کی ادائیگی لازم ہوگی ‘ یہاں تک کہ ان کی تعداد ١٥٩ ہوجائے ‘ جب ان کی تعداد ١٦٠ ہوجائے گی تو ان میں چاربنت لبون کی ادائیگی لازم ہوجائے گی ‘ ١٦٩ تک میں یہی حکم ہے ‘ جب ان کی تعداد ١٧٠ ہوجائے گی ‘ تو ان میں ایک جذعہ اور تین بنت لبون کی ادائیگی لازم ہوگی ‘ یہ حکم ١٧٩ تک میں ہے ‘ جب ان کی تعداد ١٨٠ ہوجائے تو ان میں دوحقہ اور دوبنت لبون کی ادائیگی لازم ہوگی ‘ یہ حکم ١٨٩ تک ہے ‘ جب ان کی تعداد ١٩٠ ہوجائے تو ان میں تین حقہ اور ایک بنت لبون کی ادائیگی لازم ہوگی ‘ یہ حکم ١٩٩ تک ہے ‘ جب ان کی تعداد ٢٠٠ ہوجائے تو ان میں چارحقہ یاپانچ بنت لبون کی ادائیگی لازم ہوگی ‘ خواہ دونوں میں سے جو بھی ہو ‘ جو بھی تمہیں ملے گا تم اسے وصول کرلوگے ‘ اس گنتی کے مطابق جو ہم نے اس کتاب میں تحریر کیا ہے۔
اس کے بعد اونٹوں کی تمام قسموں میں اس کے مطابق وصولی کی جائے گی جو ہم نے اس کتاب میں تحریر کردیا ہے۔
بکریوں میں زکوۃ اس وقت وصول نہیں کی جائے گی جب تک ان کی تعداد ٤٠ نہ ہوجائے ‘ جب ان کی تعداد ٤٠ ہوجائے گی ‘ تو ان پر ایک بکری کی ادائیگی لازم ہوجائے گی ‘ یہ حکم ١٢٠ بکریاں ہونے تک ہے ‘ جب ان کی تعداد ١٢١ ہوجائے گی ‘ تو ان میں دو بکریوں کی ادائیگی لازم ہوجائے گی ‘ یہ حکم ٢٠٠ کی تعداد ہے ‘ جب ان کی تعداد ٢٠١ ہوجائے گی ‘ تو ان میں تین بکریوں کی ادائیگی لازم ہوجائے گی ‘ یہ حکم ٣٠٠ تک ہے ‘ جب ان کی تعداد ٣٠٠ سے زیادہ ہوجائے گی ‘ تو ٤٠٠ تک میں صرف تین بکریوں کی ادائیگی لازم ہوگی ‘ جب ان کی تعداد ٤٠٠ ہوجائے گی ‘ تو اس میں چار بکریوں کی ادائیگی لازم ہوگی ‘ یہ حکم پانچ سو کی تعدادتک ہے جب ان کی تعداد ٥٠٠ تک ہوگی ‘ تو ان میں یاک مزید بکری کی ادائیگی لازم ہوگی ‘ یہ حکم ٦٠٠ تک ہے جب ان کی تعداد ٧٠٠ تک ہوجائے تو ان میں ٧ بکریوں کی ادائیگی لازم ہوجائے گی ‘ یہاں تک کہ ان کی تعداد ٨٠٠ ہوجائے ‘ جب ان کی تعداد ٨٠٠ ہوجائے گی ‘ تو ٨ بکریوں کی ادائیگی لازم ہوگی ‘ یہاں تک کہ ان کی تعداد ٩٠٠ ہوجائے گی ‘ جب ان کی تعداد ٩٠٠ ہوجائے گی ‘ تو ان میں ٩ بکریوں کی ادائیگی لازم ہوجائے گی یہاں تک کہ ان کی تعداد ١٠٠٠ ہوجائے ‘ جب ١٠٠٠ بکریاں ہوجائیں گی ‘ تو ان میں دس بکریوں کی ادائیگی لازم ہوجائے گی ‘ پھر اس کے بعد جو بھی تعداد زیادہ ہوگی ‘ ہر ایک سو میں ایک بکری کی ادائیگی (بطور زکوۃ ) لازم ہوگی۔