3318 ۔ حضرت عبداللہ بن مسعود (رض) بیان کرتے ہیں : نبی کریم (صلی اللہ علیہ وآلہ وسلم) نے قتل خطاء کی دیت میں ایک سو اونٹوں کی ادائیگی کا فیصلہ دیا تھا، جن میں سے بیس، حقہ، ہوں گے اور بیس جذعہ، بیس بنات لبون، بیس بنات مخاض ہوں گی اور بیس بنومخاض ہوں گے۔ یہ حدیث ضعیف ہے اور علم حدیث کے ماہرین کے نزدیک یہ کئی اعتبار سے ثابت نہیں ہے۔ اس کی ایک وجہ یہ ہے کہ یہ روایت اس روایت کی مخالف ہے جسے حضرت عبداللہ بن مسعود (رض) کے صاحبزادے ابوعبیدہ نے صحیح سند کے ساتھ نقل کیا ہے ، جس سند پر طعن نہیں کیا جاسکتا، اور اس روایت کی تاویل نہیں کی جاسکتی، ابوعبیدہ اپنے والد کی نقل کردہ حدیث اور ان کے مذہب اور ان کے فتوی کے بارے میں ، خشف ، بن مالک اور اس جیسے دیگر افراد سے زیادہ واقفیت رکھتے ہیں ۔
حضرت عبداللہ بن مسعود (رض) اپنے پروردگار سے بہت ڈرنے والے تھے اور اپنے دین میں نہایت پختہ تھے ان کے بارے میں یہ توقع نہیں کی جاسکتی کہ وہ نبی کریم (صلی اللہ علیہ وآلہ وسلم) کے حوالے سے کوئی روایت نقل کریں کہ نبی کریم (صلی اللہ علیہ وآلہ وسلم) نے یہ فیصلہ دیا ہے اور پھر اس کے خلاف فتوی دیں ، یہ بات حضرت عبداللہ بن مسعود (رض) جیسی شخصیت کے بارے میں گمان بھی نہیں کی جاسکتی، حالانکہ جب ان کے سامنے ایک مسئلہ آیا تو انھوں نے اس کا جواب دیتے ہوئے یہ بات ارشاد فرمائی تھی میں نے اس بارے میں نبی کریم (صلی اللہ علیہ وآلہ وسلم) سے کوئی بات نہیں سنی ہے۔ اور مجھے اس بارے میں نبی کریم (صلی اللہ علیہ وآلہ وسلم) کے حوالے سے کسی روایت کا کوئی علم نہیں ہے ، اس لیے میں اس مسئلہ میں اپنی رائے پیش کروں گا، اگر وہ ٹھیک ہوئی تو یہ اللہ اور اس کے رسول کی طرف سے ہوگی، اور اگر اس میں کوئی غلطی ہوئی تو وہ میری طرف سے ہوگی پھر اس کے بعد حضرت عبداللہ بن مسعود (رض) کو اس بات کا پتہ چلا کہ اس مسئلہ کے بارے میں ان کا دیا ہوافتوی نبی کریم (صلی اللہ علیہ وآلہ وسلم) کے فیصلہ کے مطابق تھا، تو ان کے ساتھیوں نے دیکھا کہ وہ اس بات سے اتنے خوش ہوئے کہ ان کا دیا ہوا فتوی نبی کریم (صلی اللہ علیہ وآلہ وسلم) کے فیصلہ کے مطابق ہے ان کے ساتھیوں نے انھیں اتناخوش کبھی نہیں دیکھا تھا، تو جن کی یہ صفت ہو اور یہ حالت ہو ان کے بارے میں یہ بات کس طرح درست ہوسکتی ہے ، کہ وہ نبی کریم (صلی اللہ علیہ وآلہ وسلم) کے حوالے سے کوئی روایت نقل کریں اور پھر اس کے خلاف (فتوی دیدیں) ۔
اس بات کی تائید اس روایت سے بھی ہوتی ہے جسے حضرت عبداللہ بن مسعود (رض) کے صاحبزادے ابوعبیدہ نے نقل کیا ہے اور یہ روایت وکیع، عبداللہ بن وہب اور دیگرمحدثین نے سفیان ثوری منصور، ابراہیم نخعی کے حوالے سے حضرت عبداللہ بن مسعود (رض) کے بارے میں نقل کی ہے ، وہ فرماتے ہیں : قتل خطاء کی دیت کی ادائیگی پانچ قسموں کے اونٹوں (کی شکل میں ہوگی) ۔