3319 ۔ ابراہیم نخعی نے حضرت عبداللہ (رض) کے بارے میں یہ روایت نقل کی ہے : وہ فرماتے ہیں : قتل خطا کی دیت کی ادائیگی پانچ قسموں کے اونٹوں (کی شکل میں ہوگی) ۔ پھر اس کے بعد ابراہیم نے اس کی وضاحت میں وہی الفاظ نقل کیے ہیں جیسے ابوعبیدہ اور علقمہ نے حضرت عبداللہ بن مسعود (رض) کے حوالے سے نقل کیے ہیں۔
اگر اس روایت میں ، ارسال، کو تسلیم کرلیا جائے تو بھی ابراہیم نخعی، حضرت عبداللہ بن مسعود (رض) ، ان کی آراء اور ان کے فتاوی کے بارے میں سب سے زیادہ علم رکھتے ہیں : کیونکہ انھوں نے اس چیز کا علم اپنے ماموں علقمہ ، اسود، اور عبدالرحمن سے حاصل کیا ہے اور ان کے علاوہ حضرت عبداللہ بن مسعود (رض) کے اکابر شاگردوں سے حاصل کیا ہے ۔
ابراہیم نخعی یہ فرماتے ہیں : جب میں آپ کے سامنے یہ کہوں : حضرت عبداللہ بن مسعود (رض) نے یہ بات ارشاد فرمائی ہے تو اس کا مطلب یہ ہوگا کہ میں نے وہ بات حضرت عبداللہ بن مسعود (رض) کے کئی شاگردوں سے سنی ہے لیکن اگر میں نے کوئی بات کسی ایک شخص سے سنی ہو تو میں اس کا نام آپ کے سامنے بیان کردوں گا۔
اس مسئلہ کادوسراپہلو یہ ہے ، وہ مرفوع روایت جس میں بنومخاض کا ذکر ہے ہمارے علم کے مطابق اسے صرف خشف بن مالک نے حضرت عبداللہ کے حوالے سے نقل کیا ہے اور یہ ایک مجہول شخص ہے اس کے حوالے س ے صرف زید بن جبیر حشمی نے احادیث روایت کی ہیں اور علم حدیث کے ماہرین ایسی روایت کو دلیل کے طور پر پیش نہیں کرتے جسے نقل کرنے میں ایک مجہول راوی منفردہو، ان حضرات کے نزدیک کسی بھی روایت پر عمل کرنا اس وقت ثابت ہوگا جب اسے روایت کرنے والاشخص عادل اور مشہور ہو یا کوئی ایساشخص ہو جسے مجہول قرار نہ دیا جاسکے، اور پھر اس کے حوالے سے دویادو سے زیادہ افراد اس روایت کو نقل کریں کیونکہ اس صورت میں اس راوی کو مجہول قرار نہیں دیا جاسکے گا، اور وہ معروف شمار ہوگا، لیکن اگر اس شخص کے حوالے سے صرف ایک فرد نے روایت کو نقل کیا ہو اور وہ بھی اس روایت کو نقل کرنے میں منفرد ہو تو ایسی روایت کے بارے میں توقف کیا جائے گا، یہاں تک کہ دوسری روایت اس کے موافق آجائے ۔ باقی اللہ بہترجانتا ہے۔
اس کا ایک پہلو یہ ہے : خشف بن مالک کی روایت کو ہمارے علم کے مطابق زید بن جبیر کے حوالے سے صرف حجاج بن ارطاۃ نے نقل کیا ہے ، اور حجاج ایک ایسا شخص ہے جو تدلیس کے حوالے سے مشہور ہے اور وہ ان حضرات کے حوالے سے بھی روایت نقل کردیتا ہے جن سے اس کی ملاقات نہ ہوئی ہو، اور جن سے اس نے احادیث کا سماع نہ کیا ہو۔
شیخ ابومعاویہ ضریر فرماتے ہیں : حجاج نے مجھ سے یہ کہا تھا، کوئی شخص مجھ سے روایت کے بارے میں سوال نہ کرے یعنی میں جب تمہیں کوئی روایت بیان کروں تو مجھ سے یہ نہ پوچھو آپ کو اس بارے میں کس نے بتایا ہے ؟۔
یحییٰ بن زکریا بیان کرتے ہیں : ایک دن میں حجاج بن ارطاۃ کے پاس موجود تھا، اس نے دروازہ بند کرنے کا حکم دیاپھربولا میں نے زہری سے کوئی روایت نہیں سنی ، ابراہیم نخعی اور شعبی سے صرف ایک ایک روایت سنی ہے میں نے فلاں سے بھی کوئی روایت نہیں سنی فلاں سے بھی کوئی روایت نہیں سنی اس طرح اس نے سترہ کے لگ بھگ افراد کا نام لیایہ سب حضرات وہ تھے جن کے حوالے سے حجاج روایات نقل کرتا ہے اور پھر ان کے حوالے سے روایات نقل کرنے کے بعد اس نے یہ کہا کہ اس نے ان حضرات سے ملاقات نہیں کی اور ان حضرات سے کوئی روایت نہیں سنی۔
سفیان بن عیینہ یحییٰ بن سعید القطان اور عیسی بن یونس نے اس کے ساتھ بیٹھ کر اس کے بارے میں جان کر اس کی روایات کو متروک قرار دیا ہے اور آپ کے لیے ان حضرات کا علم رجال میں ماہرہوناکافی ہے۔
سفیان بن عیینہ فرماتے ہیں : ایک مرتبہ حجاج بن ارطاۃ کے پاس گیا میں اس کا کلام سن رہا تھا اس نے ایک ایسی بات کا ذکر کیا جو میرے نزدیک غلط تھی تو میں نے اس کے حوالے سے کوئی روایت نقل نہیں کی۔
یحییٰ بن سعید القطان فرماتے ہیں : میں نے مکہ میں حجاج بن ارطاۃ کو دیکھا لیکن میں نے اس سے کوئی حدیث نوٹ نہیں کی میں نے کسی شخص کے حوالے سے بھی اس سے کوئی حدیث نوٹ نہیں کی اس کی وجہ یہ ہے کہ : یحییٰ بن سعید کے نزدیک حجاج روایات میں ، اضطراب، نقل کرتا ہے۔ یحییٰ بن معین فرماتے ہیں : حجاج بن ارطاۃ کی نقل کردہ روایت کو استدلال کے طور پر پیش نہیں کیا جاسکتا۔ عبداللہ بن ادریس فرماتے ہیں : میں نے حجاج کو یہ کہتے ہوئے سنا ہے آدمی اس وقت تک سمجھدار نہیں ہوتا جب تک باجماعت نماز پڑھنانہ چھوڑ دے۔
عیسیٰ بن یونس کہتے ہیں : میں نے حجاج کو یہ کہتے ہوئے سنا ہے میں نماز پڑھنے کے لیے نکلتاہوں تو راستے میں مزدور اور سبزی فروش رکاوٹ ڈالتے ہیں۔
جریر بیان کرتے ہیں : میں نے حجاج کو یہ کہتے ہوئے سنا مال اور مرتبہ کی محبت نے مجھے ہلاکت کا شکار کردیا۔
اس مسئلہ کا ایک پہلو یہ ہے : کئی ثقہ راویوں نے اس حدیث کو حجاج بن ارطاۃ کے حوالے سے نقل کیا ہے اور اس کے حوالے سے نقل کرنے میں اس روایت میں اختلاف کیا ہے۔ عبدالرحیم بن سلیمان نے حجاج کے حوالے سے اسے ان الفاظ میں نقل کیا ہے جو ہم ان کے حوالے س ے ذکر کرچکے ہیں اس بارے میں عبدالواحد بن زیاد نے ان کی موافقت کی ہے۔
حضرت عبداللہ بن مسعود (رض) فرماتے ہیں : نبی کریم (صلی اللہ علیہ وآلہ وسلم) نے قتل خطاء کی دیت کے بارے میں یہ فیصلہ دیا تھا : اس میں پانچ طرح کے اونٹ ادا کیے جائیں گے ، بیس، جذعہ ہوں گے ، بیس بنات لبون، ہوں گی بیس، بنولبون ، ہوں گے بیس بنات مخاض ، ہوں گی ، بیس نر، بنومخاض ہوں گے۔ انھوں نے حقہ کی بجائے بنولبون ذکر کیا ہے۔