3677 ۔ یہی روایت ایک اور سند کے ہمراہ بھی منقول ہے ۔: عبدالملک بن ابوبکر اپنے والد کے حوالے سے سیدہ ام سلمہ (رض) کا یہ بیان نقل کرتے ہیں : جب ان کی رخصتی ہوئی تو نبی کریم (صلی اللہ علیہ وآلہ وسلم) نے ان سے فرمایا : تم اپنے شوہر کے نزدیک کم حیثیت کی مالک نہیں ہو، اگر تم چاہو تو میں تمہارے ساتھ تین دن قیام کرتا ہوں جو صرف تمہارے لیے ہوں گے (دیگر ازواج کو اپنی باری کے حساب سے ایک ایک دن ملے گا) اور اگر تم چاہو تو میں تمہارے ساتھ سات دن رہوں لیکن پھر اپنی تمام بیویوں (میں سے ہر ایک کے ساتھ) سات سات دن رہوں گا تو سیدہ ام سلمہ نے عرض کی آپ میرے ساتھ تین دن رہیں۔
امام مالک اور ابن ابی ذئب نے اس سے یہ حکم اخذ کیا ہے کنواری کے ساتھ سات دن رہا جائے گا اور ثیبہ کے ساتھ تین دن رہا جائے گا۔