4223 ۔ حضرت انس (رض) بیان کرتے ہیں کہ نبی اکرم (صلی اللہ علیہ وآلہ وسلم) ‘ سیدہ عائشہ (رض) کے گھر میں اپنی بعض دیگر ازواج مطہرات کے ساتھ موجود تھے ‘ یہ سب لوگ کھانے کا انتظار کررہے تھے ‘ سب سے پہلے وہ (راوی کہتے ہیں : میرا خیال ہے انھوں نے سیدہ حفصہ کا ذکر کیا تھا) سیدہ حفصہ (رض) اپنے پیالے میں ثرید لے کے آئیں اور اسے وہاں رکھا ‘ تو سیدہ عائشہ (رض) باہر آئیں ‘ انھوں نے اس پیالے کو پکڑ کر (توڑدیا) ۔ راوی کہتے ہیں : یہ حجاب کا حکم نازل ہونے سے پہلے کی بات ہے۔ سیدہ عائشہ نے اسے پکڑکرتوڑدیا ‘ تو نبی اکرم (صلی اللہ علیہ وآلہ وسلم) نے اپنے ہاتھ سے اسے پکڑا اور اسے ملاتے ہوئے فرمایا (یہاں عمران نامی راوی نے اپنے ہاتھ سے اشارہ کرکے یہ بات بتائی تھی کہ اس طرح ملایا) نبی اکرم (صلی اللہ علیہ وآلہ وسلم) نے فرمایا : تمہاری امی کو غصہ آگیا تھا ‘ جب آپ کھاکرفارغ ہوئے تو آپ نے ایک صحیح پیالہ سیدہ حفصہ (رض) کو بھجوایا اور ٹوٹا ہواپیالہ سیدہ عائشہ (رض) کو دیا۔ گویا فیصلہ یہ ہوا کہ جو شخص کوئی چیزتوڑدے گا وہ اس کو ملے گی اور اس پر اسی کی مانندچیز کی ادائیگی لازم ہوگی۔