4356 ۔ حصین بن عبدالرحمن بیان کرتے ہیں کہ میں نے ‘ عمروبن جاوان ‘ جن کا تعلق بنوتمیم سے تھا ‘ میں نے ان سے کہا : آپ کا کیا خیال ہے کہ احنف کس بنیادپرالگ ہوئے تھے ‘ تو انھوں نے بتایا : میں نے حضرت احنف (رض) کو یہ بیان کرتے ہوئے سنا ہے : میں ایک مرتبہ مدینہ منورہ آیا ‘ میں حج کے لیے جارہا تھا۔ ابھی ہم اپنے پڑاؤ کی جگہ پر تھے اور اپنی سواریاں بٹھائی ہی تھیں کہ ایک شخص ہمارے پاس آیا اور بولا : لوگ مسجد میں اکٹھے ہوگئے ہیں ‘ میں بھی وہاں گیا تو میں نے دیکھا کہ وہاں بہت سے لوگ مسجد میں اکٹھے ہوگئے ہیں اور ان کے سامنے کچھ افراد بیٹھے ہوئے ہیں ‘ جن میں حضرت علی بن ابوطالب ‘ حضرت زبیر ‘ حضرت طلحہ اور حضرت سعد بن ابی وقاص (رض) بھی تھے ‘ جب میں ان کے قریب جاکرکھڑا ہواتویہ اعلان ہوا کہ حضرت عثمان غنی (رض) تشریف لارہے ہیں ‘ جب وہ تشریف لائے تو انھوں نے زردرنگ کی چادراوڑھی ہوئی تھی۔ میں نے اپنے ساتھی سے کہا کہ یہیں ٹھہرو ! ہم دیکھتے ہیں کہ یہاں کیا ہوتا ہے ؟ حضرت عثمان غنی (رض) نے دریافت کیا : کیا علی یہاں ہیں ؟ کیا زبیریہاں ہیں ؟ کیا طلحہ یہاں ہیں ؟ کیا سعد بن ابی وقاص یہاں ہیں ؟ لوگوں نے بتایا : جی ہاں۔ پھر عثمان غنی (رض) نے فرمایا : میں آپ لوگوں کو اللہ کے نام کی قسم دے کر دریافت کرتا ہوں ‘ جس کے علاوہ کوئی معبود نہیں ‘ کیا آپ لوگ یہ جانتے ہیں کہ نبی اکرم (صلی اللہ علیہ وآلہ وسلم) نے یہ بات ارشاد فرمائی تھی : جو شخص فلاں شخص کی کھجوروں کو سکھانے والی جگہ خرید کر اللہ تعالیٰ کے نام کردے گا ‘ اللہ تعالیٰ اس کی مغفرت کردے گا ‘ تو میں نے وہ جگہ خرید کردی۔ میں نبی اکرم (صلی اللہ علیہ وآلہ وسلم) کی خدمت میں حاضرہوا اور میں نے آپ کو بتایا کہ میں نے وہ جگہ خریدلی ہے ‘ تو نبی اکرم (صلی اللہ علیہ وآلہ وسلم) نے ارشاد فرمایا : اس جگہ کو ہماری مسجد میں شامل کردو تمہیں اس کا اجرملے گا۔
تو وہاں موجودتمام افراد نے کہا : یہ بات بالکل ٹھیک ہے۔
اس کے بعد حضرت عثمان غنی (رض) نے فرمایا : میں آپ لوگوں کو اللہ کی قسم دے کر یہ دریافت کرتا ہوں جس کے علاوہ کوئی معبود نہیں ہے ‘ کیا آپ حضرات یہ بات جانتے ہیں ؟ نبی اکرم (صلی اللہ علیہ وآلہ وسلم) نے یہ بات ارشاد فرمائی تھی : جو شخص رومہ کا کنواں خرید کردے گا ‘ اسے اس کا اجرملے گا ‘ تو یہ سننے کے بعد میں نبی اکرم (صلی اللہ علیہ وآلہ وسلم) کی خدمت میں حاضرہوا اور میں نے عرض کی : میں نے رومہ کا کنواں خرید لیا ہے ‘ تو نبی اکرم (صلی اللہ علیہ وآلہ وسلم) نے ارشاد فرمایا : اسے مسلمانوں کے پانی پینے کے لیے چھوڑدو ‘ تمہیں اس کا اجرملے گا۔
اس پر تمام حاضرین نے کہا کہ آپ نے یہ بات بالکل ٹھیک بیان کی ہے۔ اس کے بعد حضرت عثمان غنی (رض) نے فرمایا : میں آپ لوگوں کو اس اللہ کے نام کی قسم دے کر دریافت کرتا ہوں جس کے علاوہ اور کوئی معبود نہیں ہے ‘ کیا آپ کو یہ بات معلوم ہے کہ نبی اکرم (صلی اللہ علیہ وآلہ وسلم) نے یہ بات ارشاد فرمائی ہے : کون شخص ہے جو غزوہ تبوک کے لیے سامان فراہم کرے گا ‘ اللہ تعالیٰ اس کی مغفرت کردے گا۔ (حضرت عثمان (رض) فرماتے ہیں :) تو میں نے اس لشکر کو پوراسامان فراہم کیا ‘ یہاں تک کہ اونٹ کو باندھنے والی رسی اور مہار بھی انھیں فراہم کی تو سب لوگوں نے کہا : آپ نے یہ بات بھی ٹھیک بیان کی ہے۔ اس پر حضرت عثمان غنی (رض) نے یہ فرمایا : اے اللہ ! توگواہ ہوجا ! اے اللہ ! توگواہ ہوجا ! اے اللہ ! توگواہ ہوجا ! یہاں روایت کے الفاظ نقل کرنے میں راویوں نے اختلاف کیا ہے۔
ابن ادریس نامی راوی نے اپنی روایت میں یہ الفاظ نقل کیے ہیں : کون شخص بنوفلاں کی کھجوروں کو سکھانے والی جگہ کو خریدے گا کہ اللہ تعالیٰ اس کی مغفرت کردے تو میں نے بیس ہزاردرہم کے عوض میں (راوی کو شک ہے شاید یہ الفاظ ہیں :) پچیس ہزاردرہم کے عوض میں اسے خریدا۔
اسی طرح انھوں نے بئررومہ کے بارے میں بھی یہ بات بیان کی کہ میں نے اسے اتنی ‘ اتنی رقم کے عوض میں خریدا تھا ‘ پھر میں نبی اکرم (صلی اللہ علیہ وآلہ وسلم) کی خدمت میں حاضرہواتو آپ نے ارشاد فرمایا کہ تم اسے مسلمانوں کے پینے کے لیے وقف کردو ‘ اس کا اجر تمہیں ملے گا۔
علی بن عاصم نامی راوی نے اپنی روایت میں کھجوروں کو سکھانے والی جگہ کے واقعے میں یہ بات نقل کی ہے۔ میں نے اتنی ‘ اتنی رقم کے عوض میں اسے خریدا تھا ‘ پھر میں نبی اکرم (صلی اللہ علیہ وآلہ وسلم) کی خدمت میں حاضر ہوا اور عرض کی ہے۔ میں نے بنوفلاں کی کھجوروں والی جگہ کو خریدلیا ہے ‘ آپ اسے مسلمانوں کی مسجد میں توسیع کے لیے استعمال کریں تو نبی اکرم (صلی اللہ علیہ وآلہ وسلم) نے ارشاد فرمایا : ٹھیک ہے ! تمہارا اجرواجب ہوگیا ہے۔
اسی طرح انھوں نے بئررومہ کے بارے میں یہ فرمایا تھا ‘ میں نے اسے بیس ہزار درہم کے عوض میں (راوی کو شک ہے یا شایدیہ الفاظ ہیں :) پچیس ہزاردرہم کے عوض میں خریدا۔ جبکہ ابوعوانہ نامی راوی نے اپنی روایت میں یہ الفاظ نقل کیے ہیں : میں نے کھجوروں کو سکھانے والی جگہ کو بیس ہزار سے کچھ زیادہ رقم کے عوض میں خریدا۔ ان تمام روایات کا مفہوم ایک دوسرے کے قریب ہے۔