4357 ۔ ثمامہ بن حزن قشیری بیان کرتے ہی کہ میں اس وقت حضرت عثمان (رض) کے گھر کے پاس موجود تھا ‘ جب حضرت عثمان (رض) نے لوگوں کی طرف جھانک کر ارشاد فرمایا : میں آپ لوگوں کو اللہ کے نام کی قسم دے کر دریافت کرتا ہوں ‘ کیا آپ لوگ یہ بات جانتے ہیں کہ جب نبی اکرم (صلی اللہ علیہ وآلہ وسلم) مدینہ منورہ تشریف لائے تو اس وقت وہاں پر میٹھے پانی کا کنواں صرف بئررومہ تھا ‘ تو نبی اکرم (صلی اللہ علیہ وآلہ وسلم) نے ارشاد فرمایا : کون شخص بئررومہ کو خرید کرا سے مسلمانوں کے لیے وقف کردے گا ‘ اس کے بدلے میں اسے جنت مل جائے گی۔ تو میں نے اپنے مال میں سے اسے خریدا تھا اور تمام مسلمانوں کو اس میں برابر کا حق دارقراردیا تھا۔ اور آج تم لوگ مجھے اسی کنوئیں کا پانی پینے سے روک رہے ہو اور مجھے سمندرکا (یعنی کھارا) پانی پیناپڑا ہے۔ ان لوگوں نے جواب دیا : اللہ جانتا ہے کہ ایسہی ہے۔ پھر حضرت عثمان غنی (رض) نے فرمایا : میں آپ لوگوں کو اللہ تعالیٰ کی اور اسلام کی قسم دے کر دریافت کرتا ہوں کہ کیا آپ لوگ یہ بات جانتے ہیں کہ میں نے اپنے ذاتی مال میں سے غزوہ تبوک کے لیے سامان فراہم کیا تھا ‘ تو لوگوں نے جواب دیا : اللہ جانتا ہے کہ ایساہی ہے۔ پھر حضرت عثمان غنی (رض) نے فرمایا : میں آپ کو اللہ تعالیٰ اور اسلام کی قسم دے کر یہ دریافت کرتا ہوں کہ آپ لوگ یہ بات جانتے ہیں کہ مسجد چھوٹی ہوگئی تھی تو نبی اکرم (صلی اللہ علیہ وآلہ وسلم) نے یہ ارشاد فرمایا تھا : کون شخص فلاں لوگوں کی زمین کو خرید کرا سے مسجد میں توسیع کے لیے دے گا ‘ اس کے بدلے میں اسے جنت مل جائے گی تو میں نے اپنے مال میں سے اسے خریدا تھا اور اس کے ذریعے مسجد میں اضافہ کروایا تھا ‘ آج تم لوگ مجھے اسی مسجد میں دو رکعت پڑھنے سے روک رہے ہو۔ ان لوگوں نے عرض کی : اللہ جانتا ہے کہ ایساہی ہے۔
حضرت عثمان غنی (رض) نے فرمایا : میں آپ لوگوں کو اللہ تعالیٰ اور اسلام کے نام کی قسم دے کر دریافت کرتا ہوں کہ کیا آپ لوگ یہ بات جانتے ہیں کہ نبی اکرم (صلی اللہ علیہ وآلہ وسلم) مکہ کے پہاڑ ” ثبیر “ پر موجود تھے۔ آپ کے ساتھ حضرت ابوبکر ‘ حضرت عمر اور میں بھی تھے ‘ اسی دوران وہ پہاڑحرکت کرنے لگا اور اس کے کچھ پتھرنیچے گرے تو نبی اکرم (صلی اللہ علیہ وآلہ وسلم) نے اسے پاؤں مارکر ارشاد فرمایا تھا : تم اپنی جگہ پر ساکن رہو ‘ تمہارے اوپر ایک نبی ‘ ایک صدیق اور دو شہید موجود ہیں۔ لوگوں نے کہا : اللہ جانتا ہے کہ ایسا ہی ہے ‘ تو حضرت عثمان (رض) نے اللہ اکبر اللہ اکبر کہا اور بولے : تم لوگ میرے بارے میں گواہ ہوجاؤ ! رب کعبہ کی قسم ! میں شہیدہوں ‘ یہ بات انھوں نے تین مرتبہ کہی۔
یہاں روایت کے الفاظ ایک دوسرے سے ملتے جلتے ہیں۔