4490 ۔ حضرت عبداللہ بن عمروبن العاص (رض) بیان کرتے ہیں کہ مزینہ قبیلے سے تعلق رکھنے والا ایک شخص نبی اکرم (صلی اللہ علیہ وآلہ وسلم) کی خدمت میں حاضرہوا ‘ اس نے عرض کی : یارسول اللہ ! اگر کوئی شخص رسی چرالیتا ہے ‘ تو اس بارے میں آپ کیا ارشاد فرماتے ہیں ؟ تو آپ (صلی اللہ علیہ وآلہ وسلم) نے ارشاد فرمایا : اس اور اس طرح کی (دوسری چیزوں) میں سزادی جائے گی۔ کسی جانور کی چوری پر ہاتھ نہیں کاٹا جائے گا ‘ البتہ جس جانور کو حفاظت کے ساتھ رکھا گیا ہو اس کو چرانے پر ہاتھ کاٹا جائے گا ‘ جس کی قیمت ڈھال کی قیمت کی جتنی ہوگی ‘ اس صورت میں ہاتھ کاٹا جائے گا ‘ اگر اس کی قیمت کم ہوگی تو اس صورت میں تاوان وصول کیا جائے گا اور ساتھ کوڑے لگائے جائیں گے۔ اس شخص نے دریافت کیا : درخت پر لگے ہوئے پھل کو چوری کرنے کا کیا حکم ہوگا ؟ نبی اکرم (صلی اللہ علیہ وآلہ وسلم) نے ارشاد فرمایا : اس طرح کی چیز کی چوری پر کوڑے لگائے جائیں گے ‘ درخت پر لگے پھل کو چوری کرنے پر ہاتھ نہیں کاٹے جائیں گے۔ اگر پھل کو کسی جگہ سکھانے کے لیے رکھا ہو اور وہاں سے چوری ہو ‘ تو پھر ہاتھ کاٹا جائے گا۔
اس لیے وہاں سے چرایا گیا پھل اگر ڈھال کی قیمت جتنا ہوگا تو ہاتھ کاٹا جائے گا ‘ لیکن اگر اتنی قیمت نہ ہوگی تو ہاتھ نہیں کاٹا جائے گا۔ اس نے عرض کی : جو چیز راستے میں یا کسی رہائشی علاقے میں سے چرائی جاتی ہے ‘ تو اس کے بارے میں کیا حکم ہے ؟ یا کوئی چیز گری ہوئی ملتی ہے ؟ تو اس کے بارے میں کیا حکم ہوگا ؟ نبی اکرم (صلی اللہ علیہ وآلہ وسلم) نے فرمایا : تم سال بھر اس کا اعلان کرتے رہو ‘ اگر اس کا مالک آجائے تو اسے اداکردو ‘ ورنہ اسے استعمال کرلو “ اس کا مالک جس وقت بھی تمہارے پاس آئے گا ‘ تم اسے اداکروگے ‘ اگر کوئی چیز غیر آباد بستی میں یا انجام راستے میں سے ملے ‘ اس میں سے نکلنے والے خزانے میں پانچویں حصے کی ادائیگی کا حکم ہے۔
اس شخص نے دریافت کیا : اگر گم شدہ بکری ملتی ہے ‘ تو اسے بارے میں آپ کا کیا حکم ہے ؟ تو نبی اکرم (صلی اللہ علیہ وآلہ وسلم) نے ارشاد فرمایا : وہ تمہیں ملے گی یا تمہاری کسی بھائی کو ملے گی یابھیڑیے کو مل جائے گی ‘ اس لیے اسے اپنے بھائی کی گم شدہ چیز کے طورپرسنبھالو۔ اس شخص نے عرض کی : گم شدہ اونٹ کے بارے میں آپ کی کیا رائے ہے ؟ نبی اکرم (صلی اللہ علیہ وآلہ وسلم) نے ارشاد فرمایا : اس کو کوئی پروا نہیں ہے ‘ اس کا پیٹ اور اس کا پاؤں اس کے ساتھ ہے ‘ وہ خود کھالے گا ‘ پانی پی لے گا ‘ یہاں تک کہ اس کا مالک اس تک پہنچ جائے گا۔