ابوملیح اپنے والد کے حوالے سے یہ بات نقل کرتے ہیں : ایک مرتبہ ہم نبی اکرم (صلی اللہ علیہ وآلہ وسلم) کی اقتداء میں نماز ادا کررہے تھے، اس دوران ایک شخص آیا جو نابینا تھے، وہ گڑھے میں گرگیا تو ہم ہنس پڑے، تو اس پر نبی اکرم (صلی اللہ علیہ وآلہ وسلم) نے ہمیں دوبارہ مکمل وضو کرنے اور نئے سرے سے نماز ادا کرنے کا حکم دیا۔ یہی روایت ایک اور سند کے ہمراہ منقول ہے، اس میں حسن بن دینار اور حسن بن عمارہ دونوں راوی ضعیف ہیں، انھوں نے اس کی سند میں غلطی کی ہے۔
حسن بصری (رح) نے اس روایت کو حفصہ بن سلمان کے حوالے سے، ابو العالیہ کے حوالے سے روایت کے طور پر نقل کیا ہے۔ حسن بکثرت ” مرسل “ روایت نبی اکرم (صلی اللہ علیہ وآلہ وسلم) کے حوالے سے نقل کرتے ہیں۔ یہاں تک حسن بن عمارہ کا اس روایت سے تعلق ہے، انھوں نے خالد کے حوالے سے ابو ولید کے حوالے سے ، ان کے والد کے حوالے سے اس بات کو نقل کیا ہے، تو یہ بہت قبیح وہم ہے۔ اس روایت کو خالد نے حفصہ بنت سرین اور ابوالعالیہ کے حوالے سے، نبی اکرم (صلی اللہ علیہ وآلہ وسلم) سے روایت کیا ہے۔ سفیان ثوری، حماد بن سلمہ دیگر راویوں نے بھی اسی طرح ان کے حوالے سے نقل کیا ہے۔
ابن اسحاق نامی راوی نے اپنی روایت میں حسن بن دینار سے منقول ہونے کے حوالے سے اضطراب نقل کیا ہے، بعض اوقات ان کے حوالے سے ابوقتادہ کے حوالے سے ، ابوالملیح کے حوالے سے، ان کے والد کے حوالے سے نقل کرتے ہیں۔ قتادہ نے اس روایت کو ابو العالیہ کے حوالے سے ” مرسل “ روایت کے طور پر نبی اکرم (صلی اللہ علیہ وآلہ وسلم) سے نقل کیا ہے۔ سعد بن ابو عروبہ، معمر، ابوعوانہ، سعد بن بشیر کے حوالے سے نقل کیا ہے اور دیگر راویوں نے ان کے حوالے سے نقل کیا ہے، اس کے بعد ہم ان حضرات کی حدیث کو ذکر کریں گے۔