Ibn Abi Shaybah: Hadith 19731

(١٩٧٣٢) حضرت شرحبیل بن سمط (رض) کہتے ہیں کہ ہم نے حضرت کعب بن مرہ (رض) سے کہا کہ اے کعب (رض) ! ہمیں حضور (صلی اللہ علیہ وآلہ وسلم) کی بیان کردہ کوئی حدیث سنائیں اور اللہ سے ڈریں ! حضرت کعب بن مرہ (رض) نے فرمایا کہ میں نے رسول اللہ (صلی اللہ علیہ وآلہ وسلم) کو فرماتے ہوئے سنا کہ دشمن پر تیر چلاؤ۔ جس کا تیر دشمن کو لگ گیا اللہ تعالیٰ جنت میں اس کا ایک درجہ بلند فرما دیتے ہیں۔ حضور (صلی اللہ علیہ وآلہ وسلم) کا یہ ارشاد سن کر حضرت عبد الرحمن بن ابی نحام (رض) نے کہا کہ یا رسول اللہ ! وہ درجہ کتنا ہے ! حضور (صلی اللہ علیہ وآلہ وسلم) نے فرمایا کہ وہ درجہ تمہارے باپ کی زمین جتنا نہیں بلکہ دو درجوں کے درمیان سو سال کی مسافت کا فاصلہ ہے۔ ہم نے پھر کہا اے کعب (رض) ! حضور (صلی اللہ علیہ وآلہ وسلم) کی بیان کردہ کوئی حدیث سنائیں اور اس سے ڈریں۔ انھوں نے فرمایا کہ میں نے اللہ کے رسول (صلی اللہ علیہ وآلہ وسلم) کو فرماتے ہوئے سنا ہے کہ جس شخص کے بال اللہ کے راستے میں سفید ہوئے اس کے لیے قیامت کے دن نور ہوگا اور جس شخص نے اللہ کے راستہ میں تیر چلایا یہ اس شخص کی طرح ہے جس نے ایک غلام آزاد کیا۔