Ibn Abi Shaybah: Hadith 31837

(٣١٨٣٨) حضرت فضیل فرماتے ہیں کہ حضرت ابراہیم نے اس عورت کے بارے میں فرمایا جو اپنے شوہر اور اپنے آزاد ماں شریک بھائی کو چھوڑ کرمری جبکہ اس کا ایک غلام بیٹا بھی تھا، کہ اس کے شوہر کے لیے آدھا مال یعنی تین حصّے ہیں اور اس کے ماں شریک بھائیوں کے لیے ایک تہائی مال یعنی دو حصّے ہیں، اور چھٹا حصّہ جو باقی بچا وہ عصبہ کے لیے ہے، اور اس کا غلام بیٹا کسی چیز کا وارث نہ ہوگا حضرت علی (رض) کے فیصلے کے مطابق۔
اور اس مسئلے میں حضرت عبداللہ (رض) نے یہ فیصلہ فرمایا کہ اس کے شوہر کے لیے چوتھائی مال یعنی ڈیڑھ حصّہ ہے ، اور اس کا بیٹا ماں شریک بھائیوں کے حصّے کے لیے مانع ہوگا جبکہ وہ غلام ہو، اور شوہر کے حصّے کو کم کر دے گا، اور باقی تین چوتھائی مال عصبہ کے لیے ہے۔
اور اس مسئلے میں حضرت زید (رض) نے یہ فیصلہ فرمایا کہ اس کے شوہر کے لیے آدھا مال یعنی تین حصّے ہیں، اور اس کے ماں شریک بھائیوں کے لیے ایک تہائی مال یعنی دو حصّے ہیں، اور باقی مال بیت المال میں رکھا جائے گا جبکہ کوئی مولیٰ یا ذوی الأرحام میں سے کوئی رشتہ دار نہ ہو۔
حضرت ابوبکر فرماتے ہیں کہ یہ مسئلہ حضرت علی (رض) اور زید (رض) کی رائے میں چھ حصّوں سے نکلے گا، اور حضرت عبداللہ بن مسعود (رض) کی رائے میں چار حصّوں سے نکلے گا۔