Ibn Abi Shaybah: Hadith 33212

(٣٣٢١٣) حضرت بشر بن عاصم (رض) فرماتے ہیں کہ حضرت عمر بن خطاب (رض) نے ان کی طرف ایک عہدہ سپرد کرنا چاہا۔ تو انھوں نے فرمایا : مجھے اس کی کوئی ضرورت نہیں ہے۔ بیشک میں نے رسول اللہ (صلی اللہ علیہ وآلہ وسلم) کو یوں فرماتے ہوئے سنا کہ عہدیداران سلطنت کو قیامت کے دن لایا جائے گا اور ان کو جہنم کے کنارے پر کھڑا کردیا جائے گا۔ پس ان میں سے جو اللہ کا فرمان بردار ہوگا تو اللہ اس کو اپنے داہنے ہاتھ سے پکڑ لیں گے یہاں تک کہ اس کہ جہنم سے نجات دیں گے ، اور جس نے اللہ کی نافرمانی کی ہوگی تو جہنم کا پُل اس کو وادی میں پھینکے گا جہاں آگ اس کو لپیٹ لے گی۔ راوی کہتے ہیں حضرت عمر (رض) نے حضرت ابو ذر (رض) اور حضرت سلمان (رض) کی طرف قاصد بھیجا۔ اور حضرت ابو ذر (رض) سے پوچھا : کیا آپ (رض) نے یہ حدیث رسول اللہ (صلی اللہ علیہ وآلہ وسلم) سے سنی ہے ؟ انھوں نے فرمایا : جی ہاں۔ اللہ کی قسم ! اور فرمایا : اس وادی کے بعد جہنم کی ایک اور وادی ہوگی۔ اور حضرت سلمان (رض) سے پوچھا : تو انھوں نے اس بارے میں کچھ بھی بتانا ناپسند کیا۔ اس پر حضرت عمر (رض) نے فرمایا : جب اس بارے میں ایسی بات ہے تو اس کو کون شخص لے گا ؟ تو حضرت ابوذر (رض) نے فرمایا : جس شخص کے اللہ ناک اور آنکھ کاٹے اور جس کو ذلیل کرنا چاہے۔