Ibn Abi Shaybah: Hadith 34133

(٣٤١٣٤) حضرت علی (رض) ارشاد فرماتے ہیں کہ میں نے عرض کیا اے اللہ کے رسول ! اگر آپ مناسب سمجھیں تو کتاب اللہ کے خمس میں سے جو ہمارا حصہ ہے اس کا مجھے ولی بنادیں تاکہ میں آپ کی زندگی میں ہی اس کو تقسیم کر دوں، تاکہ آپ کے بعد کوئی مجھ سے جھگڑا نہ کرے، فرماتے ہیں کہ انھوں نے اس طرح کیا آنحضرت (صلی اللہ علیہ وآلہ وسلم) نے مجھے اس کا ولی بنادیا۔ میں نے آنحضرت (صلی اللہ علیہ وآلہ وسلم) کی زندگی میں ہی اس کو تقسیم کردیا، پھر حضرت ابوبکر صدیق نے مجھے ولی بنایا تو میں نے حضرت ابوبکر صدیق (رض) کی زندگی میں ہی اس کو تقسیم کردیا۔ پھر حضرت عمر (رض) نے مجھے ولی بنایا تو میں نے حضرت عمر (رض) کی زندگی میں اس کو تقسیم کردیا۔ یہاں تک کہ حضرت عمر (رض) کے دور خلافت کا آخری سال آگیا، ان کے پاس بہت زیادہ مال آیا انھوں نے ہمارا حق الگ کر کے میری طرف ارسال کردیا اور فرمایا یہ تمہارا حق ہے یہ لے لو اور جہاں تقسیم کرنا چاہو تقسیم کرلو میں نے عرض کیا اے امیرالمومنین (رض) ہم اس سے مستغنی ہیں جب کہ مسلمانوں کو اس کی زیادہ ضرورت ہے، پس اس سال ان کو وہ واپس کردیا پھر حضرت عمر (رض) کے بعد کسی نے ہمیں اس کی طرف نہیں بلایا یہاں تک کہ میں اس مقام پر کھڑا ہوں، حضرت عمر (رض) کے پاس سے نکلنے کے بعد میری حضرت عباس (رض) سے ملاقات ہوئی انھوں نے فرمایا : اے علی (رض) آپ نے صبح ہمیں ایک چیز سے (حق سے) محروم کردیا اب قیامت تک ہمیں نہیں دیا جائے گا۔ اور حضرت عباس (رض) عمدہ رائے والے شخص تھے۔