(٣٢٦٧٨) حضرت عبداللہ بن عبید بن عمیر (رض) فرماتے ہیں کہ جب حضرت عمر (رض) کو نیزہ مارا گیا تو حضرت ابن عباس (رض) آپ (رض) کے پاس تشریف لائے اور آپ (رض) سے فرمایا : اے امیر المؤمنین : یقیناً آپ کا اسلام مسلمانوں کی مدد ثابت ہوا، اور آپ کی خلافت مسلمانوں کی فتح۔ اللہ کی قسم ! آپ (رض) نے زمین کو عدل و انصاف سے بھر دیا۔ یہاں تک کہ اگر دو آدمیوں کے درمیان جھگڑا ہوتا تو وہ دونوں آپ کی طرف اپنا معاملہ سونپ دیتے۔ حضرت عمر (رض) نے فرمایا : لوگو مجھے بٹھا دو ۔ پس لوگوں نے ان کو بٹھایا ۔ آپ (رض) نے فرمایا : مجھ پر دوبارہ اپنی بات دہراؤ ۔ تو حضرت ابن عباس (رض) نے دوبارہ اپنی بات دہرائی۔ آپ (رض) نے فرمایا : کیا تم اس بات کی اس دن گواہی دو گے جب تم اپنے رب سے ملو گے ؟ انھوں نے فرمایا : جی ہاں ! راوی کہتے ہیں۔ اس بات سے حضرت عمر (رض) مسرور ہوئے اور بہت خوش ہوئے۔