(٣٣٣٢١) حضرت بجالہ بن عبدۃ العنبری (رض) فرماتے ہیں کہ میں حضرت جزء بن معاویہ (رض) کا کاتب تھا اور آپ (رض) اھواز کے لوگوں پر امیر مقرر تھے۔ اس دوران حضرت ابو موسیٰ (رض) جو کہ بصرہ کے امیر تھے انھوں نے ہماری طرف خط لکھا کہ حضرت عمر بن خطاب (رض) نے انھیں خط لکھ کر حکم دیا ہے کہ وہ کھانے کے درمیان منہ بند کر کے آواز نکالنے والے مجوسیوں کو قتل کردیں یہاں تک کہ وہ کلام کریں۔ اور ہر عورت کو اس کے محرم سے چھین لیا جائے اور ہر جادو گر کو قتل کردیا جائے۔ تو حضرت ابو موسیٰ (رض) نے یہ خط حضرت جزء بن معاویہ کو بھی لکھ بھیجا۔ تو آپ (رض) نے زمازمہ کو بلایا ، پس انھوں نے اس بارے میں بات چیت کی۔ اور راوی کہتے ہیں جب کوئی عورت جوان ہوجاتی تو ہم اس کے محرم سے اس کو چھین لیتے اور کسی دوسرے سے اس کا نکاح کروا دیتے۔ اور اگر عورت بوڑھی ہوتی تو ہم اس کو روک دیتے اور اس پر ڈانٹ ڈپٹ کرتے۔