(٣٨١٢٢) حضرت عائشہ بیان فرماتی ہیں کہ جب رسول اللہ (صلی اللہ علیہ وآلہ وسلم) کے پاس حضرت جعفر بن ابی طالب ، زید بن حارثہ اور عبداللہ بن رواحہ کی موت کی خبر پہنچی تو رسول اللہ (صلی اللہ علیہ وآلہ وسلم) تشریف فرما ہوگئے اور آپ (صلی اللہ علیہ وآلہ وسلم) کے چہرہ مبارک پر غم کے اثرات ظاہر تھے۔ حضرت عائشہ کہتی ہیں۔ میں (آپ (صلی اللہ علیہ وآلہ وسلم) کو) دروازہ کی پھاڑ سے دیکھ رہی تھی کہ آپ (صلی اللہ علیہ وآلہ وسلم) کی خدمت میں ایک شخص حاضر ہوا اور اس نے عرض کیا۔ یا رسول اللہ (صلی اللہ علیہ وآلہ وسلم) ! جعفر کی عورتیں ۔۔۔ پھر اس آدمی نے ان عورتوں کے رونے کا ذکر کیا تو آپ (صلی اللہ علیہ وآلہ وسلم) نے اس آدمی سے کہا کہ وہ انھیں (جا کر) منع کرے۔