(٣٨١٢١) حضرت خالد بن سمرہ روایت کرتے ہیں کہ ہمارے پاس حضرت عبداللہ بن رباح انصاری تشریف لائے ۔۔۔ اور انصار صحابہ ان کو فقیہ سمجھتے تھے تو انھوں نے فرمایا : ہمیں رسول اللہ (صلی اللہ علیہ وآلہ وسلم) کے گھڑ سوار ابو قتادہ نے بیان کیا۔ کہ رسول اللہ (صلی اللہ علیہ وآلہ وسلم) نے جیش الامراء (غزوہ مؤتہ کا لشکر) کو روانہ فرمایا تو ارشاد فرمایا : ” تم پر زید بن حارثہ حاکم ہیں۔ پس اگر یہ قتل ہوجائیں تو پھر جعفر بن ابی طالب ہیں اور اگر یہ بھی قتل ہوجائیں تو پھر عبداللہ بن رواحہ ہیں۔ “ حضرت جعفر اچھل پڑے اور عرض کیا۔ یا رسول اللہ (صلی اللہ علیہ وآلہ وسلم) ! میں اس بات سے خوف نہیں کھاتا کہ آپ مجھ پر زید کو حاکم بنائیں۔ آپ (صلی اللہ علیہ وآلہ وسلم) نے فرمایا : جانے دو ! تم نہیں جانتے کہ ان میں کیا چیز خیر ہے۔
٢۔ پھر یہ لوگ چل پڑے اور جتنی دیر اللہ کو منظور تھا یہ لوگ وہاں رہے ۔ پھر (ایک دن) رسول اللہ (صلی اللہ علیہ وآلہ وسلم) منبر پر تشریف فرما ہوئے اور حکم دیا اور یہ منادی کی گئی کہ الصلاۃ جامعۃ۔ چنانچہ لوگ رسول اللہ (صلی اللہ علیہ وآلہ وسلم) کی خدمت میں جمع ہوگئے تو آپ (صلی اللہ علیہ وآلہ وسلم) نے فرمایا : ” خیر کی بات پہنچی ہے ، خیر کی بات پہنچی ہے۔ یہ بات تین مرتبہ ارشاد فرمائی۔۔۔ میں تمہیں اس لڑنے والے لشکر کے بارے میں خبر دیتا ہوں۔ یہ لوگ (یہاں سے) چلے تو ان کی دشمن سے ملاقات (اور لڑائی) ہوئی چنانچہ حضرت زید شہادت کی حالت میں قتل کردیئے گئے۔ تم لوگ ان کے لیے استغفار کرو، پھر جھنڈا حضرت جعفر بن ابی طالب نے سنبھال لیا اور انھوں نے دشمن پر خوب حملہ کیا یہاں تک کہ وہ بھی شہادت کی حالت میں قتل ہوگئے۔ تم ان کی شہادت پر گواہ بن جاؤ اور ان کے لیے استغفار کرو۔ پھر جھنڈا، حضرت عبداللہ بن رواحہ نے سنبھال لیا اور اپنے قدم خوب جما لیے (لیکن) آخر کار وہ شہید کردیئے گئے۔ تم ان کے لیے استغفار کرو پھر (ان کے بعد) جھنڈا حضرت خالد بن الولید نے سنبھال لیا ہے حالانکہ وہ (پہلے سے متعین) امیروں میں سے نہیں تھے (بلکہ) انھوں نے خود اپنے آپ کو امیر بنا لیا ہے۔ “ پھر آپ (صلی اللہ علیہ وآلہ وسلم) نے دعا مانگی ” اے اللہ ! یہ خالد تو تیری تلواروں میں سے ایک تلوار ہیں تو ہی ان کی مدد فرما۔ “ اس دن سے حضرت خالد بن الولید کا نام سیف اللہ المسلول پڑگیا ۔ اور رسول اللہ (صلی اللہ علیہ وآلہ وسلم) نے ارشاد فرمایا : ” نکل جاؤ اور اپنے بھائیوں کی مدد کرو۔ کوئی بھی تم میں سے پیچھے نہ رہے۔ “ چنانچہ صحابہ کرام پیدل اور سوار ہو کر نکل پڑے اور یہ سخت گرمی کا وقت تھا۔
٣۔ ایک رات صحابہ راستہ سے ہٹے ہوئے تھے کہ رسول اللہ (صلی اللہ علیہ وآلہ وسلم) کو اونگھ آگئی یہاں تک کہ آپ (صلی اللہ علیہ وآلہ وسلم) کجاوہ سے ایک طرف جھک گئے ۔ چنانچہ میں آپ (صلی اللہ علیہ وآلہ وسلم) کے پاس پہنچا اور میں نے آپ (صلی اللہ علیہ وآلہ وسلم) کو اپنے ہاتھ سے سہارا دیا۔ پس جب آپ (صلی اللہ علیہ وآلہ وسلم) سیدھا کرنے والے آدمی کے ہاتھ کا چھونا محسوس فرمایا تو آپ (صلی اللہ علیہ وآلہ وسلم) نے پوچھا : یہ کون شخص ہے ؟ میں نے عرض کیا : ابو قتادہ ہے۔ پھر آپ (صلی اللہ علیہ وآلہ وسلم) چل پڑے پھر (دوبارہ) آپ (صلی اللہ علیہ وآلہ وسلم) کو اونگھ آئی یہاں تک کہ آپ (صلی اللہ علیہ وآلہ وسلم) اپنے کجاوہ سے ایک طرف جھک گئے ۔ میں (دوبارہ) آپ (صلی اللہ علیہ وآلہ وسلم) کے پاس حاضر ہوا اور میں نے اپنے ہاتھ سے آپ (صلی اللہ علیہ وآلہ وسلم) کو سہارا دیا۔ پھر جب آپ (صلی اللہ علیہ وآلہ وسلم) نے کسی سیدھا کرنے والے آدمی کے ہاتھ کا چھونا محسوس کیا تو آپ (صلی اللہ علیہ وآلہ وسلم) نے پوچھا۔ یہ کون شخص ہے ؟ میں نے عرض کیا۔ ابو قتادہ ہے۔ راوی کہتے ہیں : آپ (صلی اللہ علیہ وآلہ وسلم) نے دوسری مرتبہ یا تیسری مرتبہ میں ارشاد فرمایا : میرا خیال تو اپنے بارے میں یہ ہے کہ میں نے تمہیں آج کی رات مشقت میں ڈال دیا ہے۔ راوی کہتے ہیں : میں نے عرض کیا۔ ہرگز نہیں ! میرے ماں باپ آپ پر قربان ہوں۔ میں تو دیکھ رہا ہوں کہ نیند یا اونگھ نے آپ (صلی اللہ علیہ وآلہ وسلم) کو مشقت میں ڈالا ہوا ہے۔ لہٰذا اگر آپ ایک طرف ہوجائیں اور پڑاؤ ڈال لیں تاکہ آپ (صلی اللہ علیہ وآلہ وسلم) کی نیند ختم ہوجائے ۔ آپ (صلی اللہ علیہ وآلہ وسلم) نے ارشاد فرمایا : مجھے اس بات کا خوف ہے کہ لوگ ان یخذل الناس۔ راوی کہتے ہیں : میں نے عرض کیا : ہرگز نہیں ! میرے ماں باپ آپ پر قربان ہوں۔
٤۔ آپ (صلی اللہ علیہ وآلہ وسلم) نے فرمایا : ” پھر تم ہمارے واسطے پردے والی جگہ تلاش کرو۔ “ راوی کہتے ہیں : میں راستہ سے اترا تو اچانک مجھے درختوں کا ایک جھُنڈ نظر آیا۔ چنانچہ میں آپ (صلی اللہ علیہ وآلہ وسلم) کی خدمت میں حاضر ہوا اور میں نے عرض کیا۔ یا رسول اللہ (صلی اللہ علیہ وآلہ وسلم) ! یہ درختوں کا جُھنڈ ہے جو مجھے ملا ہے۔ راوی کہتے ہیں : پھر رسول اللہ (صلی اللہ علیہ وآلہ وسلم) اور جو لوگ آپ (صلی اللہ علیہ وآلہ وسلم) کے ساتھ راستہ پر تھے وہ راستہ سے ایک طرف ہٹے اور انھوں نے پڑاؤ کیا اور درختوں کے جھنڈ میں راستہ سے پردہ کرلیا۔ پھر ہماری آنکھ اس حالت میں کھلی کہ سورج ہم پر طلوع ہوچکا تھا۔ چنانچہ ہم کھڑے ہوئے درآنحالیکہ ہم خوف زدہ تھے ۔ تو رسول اللہ (صلی اللہ علیہ وآلہ وسلم) نے ارشاد فرمایا : ” آرام آرام سے “ یہاں تک کہ سورج بلند ہوگیا پھر نبی کریم (صلی اللہ علیہ وآلہ وسلم) نے ارشاد فرمایا : ” جس آدمی نے ان دو رکعات کو صبح کی نماز سے پہلے ادا کیا ہے وہ بھی ان کو ادا کرلے “ چنانچہ یہ دو رکعات ان لوگوں نے بھی پڑھیں جنہوں نے ان کو (پہلے) پڑھا تھا اور انھوں نے بھی پڑھا جنہوں نے پہلے نہیں پڑھا تھا۔
٥۔ پھر آپ (صلی اللہ علیہ وآلہ وسلم) نے حکم دیا اور نماز کے لیے منادی کی گئی پھر رسول اللہ (صلی اللہ علیہ وآلہ وسلم) آگے ہوگئے اور آپ (صلی اللہ علیہ وآلہ وسلم) نے ہمیں نماز پڑھائی اور جب آپ (صلی اللہ علیہ وآلہ وسلم) نے سلام پھیرا تو فرمایا : ” ہم اللہ تعالیٰ کی تعریف بیان کرتے ہیں۔ ہم کسی ایسی دنیوی چیز میں مشغول نہیں تھے کہ جس نے ہمیں نماز سے لاپرواہ کردیا ہو بلکہ ہماری ارواح اللہ تعالیٰ کے قبضہ میں تھیں۔ جب چاہتے ہیں روحوں کو بھیجتے ہیں۔ خبردار ! جس آدمی کو یہ نماز کسی بندہ صالح کی طرف سے آ لے تو اس کو چاہیے کہ اس کے ساتھ ایسی نماز ہی قضا کرلے۔ “
٦۔ صحابہ نے عرض کیا۔ یا رسول اللہ (صلی اللہ علیہ وآلہ وسلم) ! پیاس ؟ آپ (صلی اللہ علیہ وآلہ وسلم) نے فرمایا : ” کوئی پیاس نہیں ہے۔ اے ابو قتادہ ! مجھے وضو والا برتن دو “۔ راوی کہتے ہیں : میں آپ (صلی اللہ علیہ وآلہ وسلم) کے پاس وضو والا برتن لے کر حاضر ہوا ۔ تو آپ (صلی اللہ علیہ وآلہ وسلم) نے اس کو اپنی گود میں رکھ لیا۔ پھر آپ (صلی اللہ علیہ وآلہ وسلم) نے اس کے منہ کے ساتھ منہ لگایا ۔ اللہ بہتر جانتا ہے کہ آپ (صلی اللہ علیہ وآلہ وسلم) نے اس میں پھونک ماری یا نہیں ماری۔ پھر آپ (صلی اللہ علیہ وآلہ وسلم) نے فرمایا : اے ابو قتادہ ! مجھے کجاوہ پر سے چھوٹا پیالہ پکڑا دو ۔ چنانچہ میں آپ (صلی اللہ علیہ وآلہ وسلم) کی خدمت میں دو پیالہ کے درمیان کا پیالہ لے کر حاضر ہوا ۔ تو آپ (صلی اللہ علیہ وآلہ وسلم) نے اس میں پانی ڈالا اور فرمایا : لوگوں کو پلاؤ۔ اور (خود) رسول اللہ (صلی اللہ علیہ وآلہ وسلم) نے آواز لگائی اور بلند آواز کر کے فرمایا : خبردار ! جس کسی کے پاس بھی برتن پہنچے تو اس کو چاہیے کہ وہ پانی پی لے۔ پس میں ایک آدمی کے پاس پہنچا اور اس کو پانی پلایا۔ پھر رسول اللہ (صلی اللہ علیہ وآلہ وسلم) کی طرف پیالہ میں بقیہ پانی لے کر لوٹا (وہاں سے مزید لے کر) میں گیا اور میں نے پہلے آدمی کے ساتھ والے کو پانی پلایا۔ یہاں تک کہ اس حلقہ کے تمام لوگوں کو میں نے پانی پلایا۔ پھر میں پیالہ کا بقیہ پانی لے کر رسول اللہ (صلی اللہ علیہ وآلہ وسلم) کی طرف لوٹا (وہاں سے مزید لے کر) اور میں گیا اور میں نے دوسرے حلقہ کو پانی پلایا یہاں تک کہ میں نے سات حلقوں کو پانی پلایا۔
٧۔ میں نے نظر لمبی کر کے وضو کے برتن میں دیکھنا شروع کیا کہ اس میں کچھ باقی ہے ؟ کہ آپ (صلی اللہ علیہ وآلہ وسلم) نے پیالہ میں پانی انڈیلا اور مجھے فرمایا : تو پی ! راوی کہتے ہیں : میں نے عرض کیا۔ میرے ماں باپ آپ پر قربان ہوں۔ مجھے کچھ زیادہ پیاس نہیں ہے۔ آپ (صلی اللہ علیہ وآلہ وسلم) نے فرمایا : ” میرے پاس سے دور رہو۔ آج کے دن تو لوگوں کو پلانے والا میں ہوں۔ “ راوی کہتے ہیں : پھر رسول اللہ (صلی اللہ علیہ وآلہ وسلم) نے پیالہ میں پانی ڈالا اور اس کو نوش فرمایا۔ پھر دوبارہ پیالہ میں پانی ڈالا اور نوش فرمایا پھر سہ بارہ آپ (صلی اللہ علیہ وآلہ وسلم) نے پیالہ میں پانی ڈالا اور نوش فرمایا۔ پھر آپ (صلی اللہ علیہ وآلہ وسلم) سوار ہوگئے اور ہم بھی سوار ہوگئے۔
٨۔ پھر آپ (صلی اللہ علیہ وآلہ وسلم) نے فرمایا : ” جب لوگ اپنے پیغمبر کو غیر موجود پائیں اور ان کی نماز ان کے بہت قریب آجائے تو تم ایسے لوگوں کے بارے میں کیا خیال رکھتے ہو کہ وہ کیا کریں “ میں نے عرض کاب۔ اللہ اور اس کا رسول ہی زیادہ جانتے ہیں۔ آپ (صلی اللہ علیہ وآلہ وسلم) نے فرمایا : ” کیا ان میں ابوبکر اور عمر موجود نہیں ہیں۔ اگر لوگ ان دونوں کی بات مانیں گے تو ہدایت پاجائیں گے اور ان کی جماعتیں بھی ہدایت پاجائیں گی اور اگر لوگ ان دونوں کی نافرمانی کریں گے تو لوگ بھی گمراہ ہوں گے اور ان کی جماعتیں بھی گمراہ ہوں گی “ یہ بات آپ (صلی اللہ علیہ وآلہ وسلم) تین مرتبہ ارشاد فرمائی۔
٩۔ پھر آپ (صلی اللہ علیہ وآلہ وسلم) چل پڑے اور ہم بھی چل پڑے ۔ یہاں تک کہ جب ہم نصف دن میں پہنچے تو لوگوں نے درختوں کے سایہ کو تلاش کیا۔ پھر ہم کچھ مہاجرین کے پاس آئے۔ ان میں حضرت عمر بھی تھے۔ ہم نے ان سے کہا کہ اگر تم اپنے نبی کو نہ پاؤ اور نماز کا وقت ہوجائے تو تم کیا کرو گے ؟ انھوں نے کہا کہ بخدا ہم تمہیں بتائیں گے۔ پھر حضرت عمر نے حضرت ابوبکر سے کہا کہ اللہ تعالیٰ فرماتا ہے {إِنَّک مَیِّتٌ وَإِنَّہُمْ مَیِّتُونَ } میرے خیال میں اللہ تعالیٰ اپنے نبی کو اپنے پاس بلائے گا۔ آپ کھڑے ہوں اور نماز پڑھائیں۔ میں آپ کے جانے کے بعد نگرانی کروں گا۔ اگر معاملات ٹھیک ہوئے تو ساتھ آملوں گا۔ پھر نماز کھڑی ہوگئی اور گفتگو رک گئی۔