Kanz al-Ummal: Hadith 14168

14168 (مسند صدیق (رض)) حضرت یزید بن ابی سفیان (رض) سے مروی ہے کہ جب حضرت ابوبکر (رض) نے مجھے ملک شام (لشکر دے کر) بھیجا تو مجھے ارشاد فرمایا :
اے یزید ! تیرے کچھ رشتے دار (شامل) ہیں۔ ممکن ہے تو ان کو امارت۔ حکومت میں ترجیح دے۔ اور یہی وہ بات ہے جس کا مجھے تجھ پر سب سے زیادہ خوف ہے۔ رسول اللہ (صلی اللہ علیہ وآلہ وسلم) کا ارشاد ہے :
جو مسلمانوں کے کاموں کا حاکم بنے پھر وہ ان پر کسی کو ناحق امیر بنائے اس پر اللہ کی لعنت ہے۔ اللہ پاک اس کا کوئی نہ فرض قبول فرمائیں گے اور نہ نفل۔ حتیٰ کہ اس کو جہنم میں داخل کردیں گے۔ اور جو کسی کو اس کی محبت میں اس کے بھائی کا مال ۔ ناجائز طور پر دے، اس پر بھی اللہ کی لعنت ہے، یا فرمایا : اس سے اللہ کا ذمہ بری ہے۔ اللہ تعالیٰ نے لوگوں کو دعوت دی ہے کہ وہ اللہ پر ایمان لائیں پس وہ ایمان کی بدولت اللہ کی حمیٰ پناہ میں ہیں۔ پس جس نے اللہ کی حمی میں ناحق ظلم کیا اس پر اللہ کی لعنت ہے یا فرمایا : اس سے اللہ عزوجل کا ذمہ بری ہے۔
مسند احمد، منصور بن شعبہ البغدادی فی الریعین
کلام : روایت کا متن حسن جبکہ اسناد ضعیف ہے۔ امام ابن کثیر (رح) فرماتے ہیں : یہ حدیث کتب ستہ میں کوئی معیار نہیں رکھتی۔ انھوں نے اس حدیث سے اعراض اس کے شیخ بقیہ کی جہالت کی وجہ سے کیا ہے۔ فرماتے ہیں کہ اس حدیث کی صحت متن کی بات جو دل میں پیدا ہوتی ہے وہ یہ ہے کہ حضرت ابوبکر (رض) نے مسلمانوں کے اوپر ان کے اچھے لوگوں کو ہی امیر بنایا ہے۔ جو اس روایت سے بھی معلوم ہوتا ہے۔