Kanz al-Ummal: Hadith 18576

18567 ۔۔۔ یوسف بن مازن سے مروی ہے کہ ایک شخص نے سیدنا حضرت علی المرتضی (رض) سے سوال کیا : کی نبی کریم (صلی اللہ علیہ وآلہ وسلم) کا حلیہ (کیسا تھا ؟ ) ہمیں بیان فرما دیجیے ۔ سیدنا حضرت علی المرتضی (رض) نے ارشاد فرمایا : آپ (صلی اللہ علیہ وآلہ وسلم) نہ بہت لمبے تھے (اور نہ کوتاہ قد) بلکہ میانہ قد سے قدرے اونچے تھے ۔ جب آپ کھڑے ہوتے تو تمام لوگوں (سے وجیہہ اور قد آور محسوس ہوتے تھے اور سب پر چھا جاتے تھے ۔ انتہائی ستھری گوری رنگت والے تھے ۔ سر بڑا روشن پیشانی ، دانت باریک ، آبدار ، سفید اور سامنے والے دانت کچھ کھلے کھلے تھے ۔ پاؤں اور ٹخنے گٹھے ہوئے تھے ۔ جب چلتے تھے تو مضبوطی کے ساتھ چلتے تھے گویا نیچے کو اتر رہے ہیں ، پسینے کے قطرے آپ کے چہرے پر موتیوں کی طرح چمکتے تھے ۔ میں نے آپ (صلی اللہ علیہ وآلہ وسلم) جیسا حسین و جمیل پہلے اور نہ کبھی بعد میں دیکھا ۔ (الدورفی)