Kanz al-Ummal: Hadith 18791

18791 ۔۔۔ ابو غطفان سے مروی ہے کہ میں نے حضرت عبداللہ ابن عباس (رض) سے سوال کیا کہ آپ نے رسول اللہ (صلی اللہ علیہ وآلہ وسلم) کو وفات کے وقت دیکھا کہ کس کی گود میں آپ کا سر تھا ؟ حضرت عبداللہ ابن عباس (رض) نے فرمایا : حضور اکرم (صلی اللہ علیہ وآلہ وسلم) کی وفات ہوئی تو آپ سیدنا حضرت علی المرتضی (رض) کے سینے کے ساتھ ٹیک لگائے ہوئے تھے ۔ میں نے کہا کہ عروۃ (رح) حضرت عائشۃ صدیقہ (رض) سے روایت کرتے ہیں حضرت عائشۃ صدیقہ (رض) فرماتی ہیں کہ آپ (صلی اللہ علیہ وآلہ وسلم) کی وفات میرے سینے اور حلق کے درمیان (ٹیک لگائے ہوئے) ہوئی تھی ۔ حضرت عبداللہ ابن عباس (رض) نے فرمایا : کیا تم عقل رکھتے ہو ۔ اللہ کی قسم ! حضور اکرم (صلی اللہ علیہ وآلہ وسلم) کی وفات ہوئی تو آپ نے حضرت علی (رض) کے سینے کے ساتھ ٹیک لگا رکھی تھی ۔ آپ (رض) اور میرے بھائی فضل بن عباس نے آپ (رض) کو غسل دیا تھا ، میرے والد نے (غسل کی جگہ آنے سے) انکار کردیا تھا اور فرمایا تھا کہ رسول اللہ (صلی اللہ علیہ وآلہ وسلم) نے ہم کو حکم دیا تھا کہ ہم پردہ رکھیں ۔ لہٰذا وہ پردے کے اس طرف بیٹھے تھے ۔ (رواہ ابن سعد) کلام : ۔۔۔ اس روایت کی سند ضعیف ہے۔