Kanz al-Ummal: Hadith 21575

21576 ۔۔۔ شمس وقمر اللہ کی آیتوں میں سے دو آیتیں ہیں ، جو کسی کی موت یا زندگی کی وجہ سے گرہن نہیں ہوتے ، جب تم ایسا دیکھو تو اللہ کو یاد کرو ، لوگوں نے عرض کیا : یا رسول اللہ ! ہم نے آپ کو دیکھا تھا کہ آپ اپنی اس جگہ پر کھڑے ہوئے آگے سے کچھ لینے کی کوشش فرما رہے تھے ، پھر آپ پیچھے ہٹنے لگے ؟ ارشاد فرمایا : میں نے جنت کو دیکھا اور اس سے پھل کا ایک خوشہ لینے کا ارادہ کیا تاکہ تم رہتی دنیا تک اس سے ہمیشہ کھاتے رہو ۔ (لیکن پھر میں نے ارادہ بدل لیا) پھر میں نے جہنم کو دیکھا اور ایسا خوفناک گھبرا دینے والا کوئی منظر نہیں دیکھا اہل جہنم میں اکثریت میں نے عورتوں کی دیکھی تھی ، لوگوں نے پوچھا وہ کیوں یا رسول اللہ ! ارشاد فرمایا : اس لیے کہ وہ کفران کرتی ہیں۔ پوچھا گیا : کیا اللہ کے ساتھ کفر کرتی ہیں ؟ ارشاد فرمایا : وہ شوہر کا کفران (یعنی ناشکری) کرتی ہیں اور احسان کو جھٹلاتی ہیں۔ اگر تو کسی عورت کے ساتھ زندگی بھر احسان کا معاملہ کرے پھر وہ کبھی تیری طرف سے کوئی کمی دیکھے تو کہے گی ،: اللہ کی قسم ! میں نے تجھ سے کبھی کوئی خیر نہیں دیکھی ۔ (مسند احمد ، البخاری ، مسلم ، النسائی ، ابن حبان ، ابن جریر عن ابن عباس (رض))