Kanz al-Ummal: Hadith 23501

23501 ۔۔۔ سیدنا حضرت علی المرتضی (رض) کی روایت ہے کہ کچھ تاجروں نے حضور اکرم (صلی اللہ علیہ وآلہ وسلم) سے پوچھا کی ہم لوگ محو سفر رہتے ہیں ہم کیسے نماز پڑھیں ، چنانچہ اللہ تعالیٰ نے یہ آیت نازل فرمائی ۔ مآیت)” واذا ضربتم فی الارض فلیس علیکم جناح ان تقصروا من الصلاۃ “۔ یعنی جب تم زمین میں محو سفر ہو تو تم پر کوئی حرج نہیں کہ تم نماز میں قصر کرو۔ پھر کچھ عرصہ کے لیے وحی کا سلسلہ بند ہوگیا ۔ پھر جب آپ (صلی اللہ علیہ وآلہ وسلم) ایک سال بعد غزوہ پر تشریف لے گئے تو نبی کریم (صلی اللہ علیہ وآلہ وسلم) نے ظہر کی نماز پڑھی مشرکین آپس میں کہنے لگے : محمد (صلی اللہ علیہ وآلہ وسلم) اور اس کے ساتھیوں نے تمہیں اپنی پشتوں پر غلبہ دے دیا ہے تم ان پر چڑھائی کیوں نہیں کردیتے ؟ ان میں سے کسی نے کہا : اس کے بعد ان کی ایک اور نماز بھی آرہی ہے چنانچہ اللہ تعالیٰ نے ان دونوں نمازوں (ظہر اور عصر) کے درمیانی وقت میں یہ آیات نازل فرمائیں : (آیت)” ان خفتم ان یفتنکم الذین کفروا ان الکافرین کانوا لکم عدوا مبینا واذا کنت فیھم فاقمت لھم الصلوۃ الی قولہ ان اللہ اعد للکافرین عذابا مھینا “۔ یعنی اگر تمہیں خوف ہو کہ کفار تمہیں فتنہ (جنگ) میں ڈال گے چونکہ کفار تمہارے کھلے دشمن ہیں۔ چنانچہ جب آپ (صلی اللہ علیہ وآلہ وسلم) مسلمانوں کے درمیان موجود ہوں تو ان کے لیے نماز قائم کریں ۔۔۔ سے لے کر ۔۔۔ بلاشبہ اللہ تعالیٰ نے کفار کے لیے رسوا کن عذاب تیار کر رکھا ہے ، تک یوں اس طرح اللہ تعالیٰ نے نماز خوف کا حکم نازل کیا ۔