Kanz al-Ummal: Hadith 33773

33764 ۔۔۔ رسول اللہ (صلی اللہ علیہ وآلہ وسلم) نے فرمایا : اے انصار کی جماعت ! تمہاری طرف سے کیا بات مجھے پہنچی ؟ اور کیا نئی چیز تم نے اپنے دلوں میں پیدا کی ؟ کیا میں تمہارے پاس نہ آیا کہ تم گمراہ تھے تو اللہ تعالیٰ نے تمہیں ہدایت دی ؟ اور محتاج تھی تو اللہ تعالیٰ نے تمہیں مالدار کیا ؟ اور ٕآپس میں دشمن تھے تو اللہ تعالیٰ نے تمہارے دلوں میں محبت ڈال دی ؟ انھوں نے عرض کیا کیوں نہیں رسول اللہ (صلی اللہ علیہ وآلہ وسلم) نے فرمایا : اے انصار کی جماعت تم مجھے کیوں جواب نہیں دیتے ؟ خبردار اللہ کی قسم اگر تم چاہو تو یہ کہو پس سچ کہو کہ آپ ہمارے پاس آئے اس طرح کہ آپ جھٹلائے ہوئے تھے سو ہم نے آپ کی تصدیق کی اور مغلوب تھے ہم نے آپ کی مدد کی اور جلاوطن تھے سو ہم نے ٹھکانا دیا اور محتاج تھے سو ہم نے آپ کے ساتھ خیرخواہی کی اے انصار کی جماعت ! کیا تم اس دنیا کے تھوڑے سے حصہ کی وجہ سے اپنے دلوں میں (ناراضگی ) پاتے ہو جس (حصہ کے ذریعہ ) میں لوگوں میں الفت ڈالتاہوں تاکہ وہ اسلام لے آئیں اور میں نے تمہیں تمہارے اسلام کے حوالے کیا ؟ اے انصار کی جماعت کیا تم اس پر خوش نہیں کہ لوگ بکریاں اور اونٹ لے جائیں اور تم اپنے گھروں میں رسول اللہ (صلی اللہ علیہ وآلہ وسلم) کو لے کر جاؤ ؟ پس اس ذات کی قسم جس کے قبضہ میں محمد (صلی اللہ علیہ وآلہ وسلم) کی جان ہے اگر ہجرت نہ ہوتی تو میں انصار میں سے ایک ہوتا اور اگر لوگ ایک گھانی میں چلیں اور انصار ایک (دوسری) گھاٹی میں چلیں تو میں انصار کی گھاٹی میں چلوں اللہ تعالیٰ انصار پر اور انصار کے بیٹوں پر اور انصار کے پوتوں پر رحم فرمائیں۔ (احمدبن حنبل عبد بن حمین سعید بن منصور بروایت ابوسعید)