Kanz al-Ummal: Hadith 3584

3584: کوئی بندہ مسلم صبح کو یہ نہیں کہتا : الحمد للہ ربی اللہ لا اشرک بہ شیئا، واشہد ان لا الہ الا اللہ۔ مگر شام تک اس کے گناہوں کی مغفرت کی جاتی ہے۔ اور کوئی بندہ شام کو یہ نہیں کہتا مگر صبح تک اس کی مغفرت کی جاتی ہے۔ (ابن سعد، الفردوس، الکبیر للطبرانی، المعجم لابی القاسم البغوی الباوردی، الافراد للدارقطنی، ابن السنی) ۔
کلام : مذکورہ کتب میں یہ روایت ابان بن ابی عیاش عن الحکم بن حیان المحاربی عن ابان المحاربی کے طریق سے منقول ہے۔ آخر الذکر ابان المحاربی حضور (صلی اللہ علیہ وآلہ وسلم) کے پاس آنے والے مشہور وفد وفد عبدالقیس میں سے ہیں۔ امام بغوی (رح) فرماتے ہیں مجھے ان سے مروی کوئی اور روایت معلوم نہیں۔ علامہ ابن حجر اصابہ میں فرماتے ہیں ان سے ایک روایت اس کے علاوہ اور بھی مروی ہے، علامہ دارقطنی (رح) ارشاد فرماتے ہیں کہ ابان بن ابی عیاش اس روایت کو نقل کرنے میں متفرد ہیں۔ اور یہ ضعیف بھی ہیں اور یہ روایت ایسی ہے جس کو حکم بن حیان روایت کرتے ہیں ابان (رض) سے اور حکم سے روایت کرتے ہیں ابان بن ابی عیاش اور یہ ابان بن ابی عیاش چونکہ ضعیف راوی ہے اس لیے روایت محل کلام ہے۔