Kanz al-Ummal: Hadith 36097

٣٦٠٨٨۔۔۔ ابن عساکر نے ابوبکر بن منصور بن زریق ابوبکر خطیب ابوبکر عبد الرحمن بن عمر بن قاسم نرسی ابوبکر محمد بن عبداللہ شافعی دار قطنی یوسف بن موسیٰ بن عبداللہ مروزی سہیل بن ابراہیم جارودی ابو خطاب یحییٰ بن محمد صنعی عبد الواحد بن ابی عمر واسدی عطاء بن ابی رباح کے سلسلہ سند سے حضرت ابن عباس (رض) کی روایت نفل کی ہے کہ ایک شخص رسول اللہ (صلی اللہ علیہ وآلہ وسلم) کے بعد حضرت ابوبکر (رض) کی خدمت میں حاضر ہوا اور عرض کیا : اے رسول اللہ (صلی اللہ علیہ وآلہ وسلم) کے خلیفہ ؟ لوگوں میں سب سے افضل کون ہے ؟ آپ (رض) نے جواب دیا : عمر بن خطاب اس شخص نے عرض کیا : آپ عمر (رض) کو اپنی ذات سے مقدم کیوں کر رہے ہیں ؟ آپ (رض) فرمایا : چند خصلتوں کی وجہ سے ہیں انھیں مقدم کررہا ہوں چونکہ اللہ تعالیٰ نے حضرت عمر (رض) پر فرشتوں کے سامنے فخر کیا ہے جب کہ اللہ تعالیٰ نے مجھ پر فخر نہیں کیا۔ چونکہ جبرائیل امین نے عمر (رض) کو سلام پیش کیا ہے جب کہ جبرائیل نے مجھے سلام نہیں پیش کیا : چونکہ اللہ تعالیٰ نے حضرت عمر (رض) کی قرآن مجید میں دو آیتوں میں تصدیق کی ہے حالانکہ میری تصدیق نہیں کی ہے۔ چنانچہ نبی کریم (صلی اللہ علیہ وآلہ وسلم) اپنی بعض ازواج مطہرات سے ناراض ہوگئے حضرت عمر (رض) ازواج مطہرات کے پاس تشریف لائے اور فرمایا : تم رسول اللہ (صلی اللہ علیہ وآلہ وسلم) سے باز آجاؤ ورنہ تمہارے متعلق ضرور اللہ قرآن مجید میں کوئی حکم نازل فرما دے گا۔ چنانچہ اللہ تبارک و تعالیٰ نے یہ آیت نازل فرمائی کہ :” عسی ربہ ان طلقکن ان یبدلہ ازواجا خیر امنکن “
ان کا رب تمہیں طلاق دے دے اور بدلہ میں تم سے بہتر عورتیں انھیں عطا فرما دے اور اس لیے کہ عمر (رض) نے عرض کیا : یا رسول اللہ (صلی اللہ علیہ وآلہ وسلم) ازواج مطہرات کے پاس نیک و بد ہر طرح کا آدمی آتا ہے اگر آپ انھیں پردہ کرنے کا حکم دے دیں چنانچہ اللہ تعالیٰ نے یہ آیت نازل فرما دی۔ ” واذا سالتموھن متاعا فاسئلوھن من وراء حجاب “ جب تم ازواج مطہرات سے کوئی چیز مانگو تو پردے کے پیچھے سے مانگو، نیز اس لیے کہ عمر (رض) نے عرض کیا یا رسول اللہ ! میرا دل چاہتا ہے کہ آپ اگر مقام ابراہیم کو مصلی (نماز پڑھنے کی جگہ) قرار دے دیں۔ چنانچہ اللہ تبارک و تعالیٰ نے عمر (رض) کی موافقت میں یہ آیت نازل فرمائی ” واتخذوا من مقام ابراہیم مصلی “ چنانچہ جب حضرت ابوبکر (رض) اللہ تعالیٰ کو پیارے ہوگئے ایک شخص حضرت عمر (رض) کی خدمت میں حاضر ہوا اور عرض کیا : اے امیر المومنین ! رسول اللہ (صلی اللہ علیہ وآلہ وسلم) کے بعد لوگوں میں سب سے افضل کون ہے ؟ آپ (رض) نے فرمایا : ابوبکر (رض) سب سے افضل ہیں جو شخص اس کے علاوہ کوئی اور اعتقاد رکھے گا اس کی سزا وہی ہے جو افتراء باندھنے والے کی سزا ہوتی ہے۔ (قال الخطیب کذا کان فی الاصل بخط الدارقطنی وقال الصبغی مضبوطا واحرجہ ابن مردویہ)