Kanz al-Ummal: Hadith 36197

٣٦١٨٨۔۔۔ عمران بن حصین کی روایت ہے کہ حضرت عثمان بن عفان (رض) نے غزوہ تبوک جسے ” جیش العسرہ “ یعنی تنگدست لشکر کے نام سے یاد کیا جاتا ہے میں بڑھ چڑھ کر حصہ لیا رسول اللہ (صلی اللہ علیہ وآلہ وسلم) نے صدقہ سازوسامان جنگی قوت اور غمخواری کا حکم دیا تھا ادھر عرب کے نصرانیوں نے ہرقل کے پاس اپنا وفد بھیج کر اسے پیغام دیا تھا کہ یہ شخص جس نے نبوت کا دعوی کر رکھا ہے ہلاکت کے قریب پہنچ گیا ہے چونکہ اس کے نام لیوا سخت قحط سالی سے بدحال ہیں ان کے اموال ختم ہوچکے ہیں اگر تم اپنے دین کی نصرت چاہتے ہو تو اس کے لیے یہی وقت ہے چنانچہ ہرقل نے اپنا ایک جرنیل بھیجا جسے ” صفار “ کہا جاتا تھا، اس کے ساتھ چالیس ہزار کا لشکر جرار تھا جب نبی کریم (صلی اللہ علیہ وآلہ وسلم) کو اس کی خبر پہنچی تو آپ نے عرب کے مختلف شہروں میں خطوط بھیجے آپ (صلی اللہ علیہ وآلہ وسلم) ہر دن منبر پر تشریف لے جاتے اور اللہ تعالیٰ سے یہ دعا مانگتے ” اللھم انک ان تھلک ھذا العصابۃ فلن تعبد فی الارض “ یا اللہ اگر تو نے اس جماعت کو ہلاک کردیا پھر زمین پر تیری عبادت نہیں کی جائے گی چونکہ لوگوں کے پاس جنگی قوت نہیں تھی، حضرت عثمان بن عفان رضی لالہ عنہ شام کی طرف تجارتی قافلہ روانہ کرنے کے لیے تیار تھے چنانچہ آپ رسول کریم (صلی اللہ علیہ وآلہ وسلم) کی خدمت میں حاضر ہوئے اور عرض کیا : یا رسول اللہ ! یہ دو سو اونٹ ساز و سامان سے لیس تیار کھڑے ہیں اور یہ دو سو اوقیہ چاندی ہے۔ (آپ انھیں قبول فرمائیں) رسول کریم (صلی اللہ علیہ وآلہ وسلم) نے نعرہ تکبیر بلند کیا اور جواب میں لوگوں نے بھی نعرہ تکبیر بلند کیا پھر رسول کریم (صلی اللہ علیہ وآلہ وسلم) ایک دوسری جگہ کھڑے ہوئے اور لوگوں کو صدقہ کرنے کی ترغیب دینے لگے۔ عثمان (رض) حاضر ہوئے اور عرض کیا، یا نبی اللہ ! یہ ہیں دو سو اونٹ اور دو سو اوقیہ چاندی آپ (صلی اللہ علیہ وآلہ وسلم) نے ایک بار پھر نعرہ تکبیر بلند کیا اور لوگوں نے بھی نعرہ بلند کیا اس کے بعد عثمان (رض) اونٹ لے آئے اور باقی نقدی مال رسول کریم (صلی اللہ علیہ وآلہ وسلم) کے سامنے ڈھیر کردیا عمران بن حصین (رض) کہتے ہیں میں نے رسول کریم (صلی اللہ علیہ وآلہ وسلم) کو ارشاد فرماتے سنا کہ آج کے بعد عثمان جو عمل بھی کریں انھیں نقصان نہیں پہنچائے گا۔ (رواہ ابن عساکر)