Kanz al-Ummal: Hadith 36326

٣٦٣١٧۔۔۔ نافع بن حارث کی روایت ہے کہ رسول اللہ (صلی اللہ علیہ وآلہ وسلم) مدینہ کے باغات میں سے ایک باغ میں داخل ہوئے اور مجھے فرمایا : دروازے پر رک جاؤ آپ (صلی اللہ علیہ وآلہ وسلم) کنویں کے کنارے بنائی گئی اونچی سی جگہ پر آکر بیٹھ گئے اور ٹانگیں کنویں میں لٹکا دیں اتنے میں دروازے پر دستک ہوئی میں نے کہا کون ہے ؟ جواب ملا ابوبکر ہوں میں نے عرض کیا یا رسول اللہ (صلی اللہ علیہ وآلہ وسلم) یہ ابوبکر ہیں فرمایا : انھیں اجازت دو اور جنت کی بشارت دو ابوبکر (رض) بھی رسول اللہ (صلی اللہ علیہ وآلہ وسلم) کے پاس منڈیر پر بیٹھ گئے اور ٹانگیں کنویں پر لٹکائیں پھر دروازے پر دستک ہوئی میں نے کہا : کون ہے جواب دیا : عمر ہوں میں نے عرض کیا یا رسول اللہ یہ عمر ہیں فرمایا : انھیں اجازت دو اور جنت کی بشارت بھی دو نافع (رض) کہتے ہیں میں نے انھیں اجازت دی اور جنت کی بشارت بھی دی وہ بھی آکر رسول اللہ (صلی اللہ علیہ وآلہ وسلم) کے ساتھ منڈیر پر بیٹھ گئے اور ٹانگیں کنویں میں لٹکا دیں پھر دروازے پر دستک ہوئی میں نے کہا : کون ہے ؟ جواب ملا عثمان ہوں میں نے عرض کیا یا رسول اللہ ! یہ عثمان ہیں فرمایا : اجازت دو اور جنت کی بشارت بھی دو لیکن ساتھ ساتھ آزمائش کا بھی انھیں سامنا کرنا ہوگا نافع (رض) کہتے ہیں میں نے انھیں اجازت دی اور جنت کی بشارت بھی دی چنانچہ وہ بھی آئے اور رسول اللہ (صلی اللہ علیہ وآلہ وسلم) کے ساتھ منڈیر پر بیٹھ گئے اور ٹانگیں کنویں میں لٹکا دیں۔ (رواہ ابن ابی شیبہ وھو صحیح)