Kanz al-Ummal: Hadith 36390

٣٦٣٨٠۔۔۔ حضرت علی (رض) کی روایت ہے کہ رسول کریم (صلی اللہ علیہ وآلہ وسلم) نے مجھے یمن بھیجا چنانچہ ہم ایسی قوم کے پاس جا پہنچے کہ انھوں نے سیر کو ہلاک کرنے کے لیے گڑھا کھود رکھا تھا وہ اسی راستے سے آتے جاتے تھے اچانک ایک شخص گڑھے میں جا گرا وہ دوسرے کے ساتھ لٹکا اور دوسرے تیسرے کے ساتھ یوں چار آدمی ہوگئے شیر نے انھیں سخت زخمی کردیا اسی اثناء میں ایک شخص نے حربے سے شیر کو ہلاک کردیا۔ (چنانچہ زخموں کی تاب نہ لاکر چاروں مرگئے) پہلے مقتول کے ورثاء نے دوسرے مقتول کے ورثاء سے مطالبہ کردیا فریقین نے تلواریں نکال لیں ، قریب تھا کہ ان میں خنجر پر جنگ چھڑ جاتی اتنے میں حضرت علی (رض) نے انھیں آن لیا اور فرمایا : تم آپس میں لڑنا چاہتے ہو حالانکہ رسول اللہ (صلی اللہ علیہ وآلہ وسلم) زندہ ہیں میں تمہارے درمیان فیصلہ کرتا ہوں بشرطیکہ تم اسے مان لو ورنہ تم رسول اللہ (صلی اللہ علیہ وآلہ وسلم) کے پاس چلے جاؤ اور وہ جو فیصلہ کردیں وہی فیصلہ ہوگا۔ اس کے بعد بھی جو شخص روگردانی کرے پھر اسے کوئی حق نہیں ۔ چنانچہ وہ قبایل جنہوں نے یہ کنواں کھودا ہے وہ چوتھائی دیت تہائی دیت نصف دیت اور کامل دیت جمع کرلیں پہلے مقتول کے لیے چوتھائی دیت ہے چونکہ وہ اپنے اوپر والوں کی وجہ سے ہلاک ہوا ہے دوسرے کے لیے تہائی دیت تیسرے کے لیے نصف دیت اور چوتھے کے لیے کامل دیت لوگوں نے یہ فیصلہ ماننے سے انکار کردیا اور وہ نبی کریم (صلی اللہ علیہ وآلہ وسلم) نے پاس آگئے اور آپ اس وقت مقام ابراہیم کے پاس تھے لوگوں نے سارا واقعہ سنا دیا ارشاد فرمایا : میں تمہارے درمیان فیصلہ کرتا ہوں آپ (رض) ہاتھ باندھ کر بیٹھ گئے قوم میں سے ایک شخص بولا علی (رض) نے ہمارے درمیان فیصلہ کردیا ہے لوگوں نے فیصلے کا بھی پورا قصہ سنایا اور نبی کریم (صلی اللہ علیہ وآلہ وسلم) نے حضرت علی (رض) کے فیصلہ کی توثیق فرمائی ایک روایت میں ہے کہ نبی کریم (صلی اللہ علیہ وآلہ وسلم) نے فرمایا : فیصلہ وہی ہے جو علی (رض) نے کردیا ہے۔ (رواہ الطبرانی وابن ابی شیبہ وابن منیع جریر و صحیح والبیہقی وضعفہ)