Kanz al-Ummal: Hadith 36708

٣٦٦٩٨۔۔۔ نزال بن سبرہ کی روایت ہے ایک دن ہم نے حضرت علی بن ابی طالب (رض) کو خوش خوش پایا ہم نے عرض کیا : اے امیر المومنین ہمیں اپنے اصحاب کے متعلق کچھ بتلائیے آپ (رض) نے کہا : رسول اللہ (صلی اللہ علیہ وآلہ وسلم) کا ہر صحابی میرا دوست ہے ہم نے کہا آپ ہمیں ابوبکر (رض) کے متعلق بتلائیں فرمایا : ابوبکر (رض) ایسے شخص تھے جنہیں اللہ تعالیٰ نے جبرائیل امین اور محمد (صلی اللہ علیہ وآلہ وسلم) کی زبان سے صدیق کہلوایا ہے وہ رسول اللہ (صلی اللہ علیہ وآلہ وسلم) کے خلیفہ تھے اللہ نے انھیں ہمارے دین کے لیے پسند فرمایا اور ہم نے انھیں اپنی دنیا کے لیے پسند کیا : ہم نے عرض کیا : آپ ہمیں عمر بن خطاب (رض) کے متعلق بتلائیں آپ (رض) بولے : میں نے رسول کریم (صلی اللہ علیہ وآلہ وسلم) کو فرماتے سنا ہے : یا اللہ ! اسلام کو عمر بن خطاب (رض) کے ذریعے عزت عطا فرما۔ ہم نے کہا : آپ ہمیں عثمان بن عفان (رض) کے متعلق بتائیں : فرمایا اس شخص کو آسمانوں میں ” ذوالنورین “ کے نام سے پکارا جاتا ہے انھوں نے رسول اللہ (صلی اللہ علیہ وآلہ وسلم) کی دو بیٹیوں سے شادی کی ہوئی تھی اور رسول اللہ (صلی اللہ علیہ وآلہ وسلم) نے انھیں جنت کی ضمانت دی ہوئی تھی۔ (رواہ خیثمۃ واللالکانی والعشاری فی فضائل الصدیق وابن عساکر)