Kanz al-Ummal: Hadith 36855

٣٦٨٤٥۔۔۔ حضرت سہل بن حنظلیہ عیشمی (رض) کہتے ہیں صحابہ کرام (رض) اجمعین رسول کریم (صلی اللہ علیہ وآلہ وسلم) کے ساتھ حنین کے دن چلے رسول اللہ (صلی اللہ علیہ وآلہ وسلم) نے فرمایا : آج رات ہمارا پہرہ کون دے گا حضرت انس بن ابی مرثد غنوی (رض) نے عرض کیا : یا رسول اللہ ! میں پہرہ دوں گا حکم ہوا : گھوڑے پر سوار ہوجاؤ چنانچہ انس (رض) بن ابی مرثر گھوڑے پر سوار ہوئے اور رسول اللہ (صلی اللہ علیہ وآلہ وسلم) کی خدمت میں حاضر ہوئے رسول اللہ (صلی اللہ علیہ وآلہ وسلم) نے فرمایا : اس گھاءی کے اوپر چلے جاؤ اور اپنی طرف سے دھوکا میں نہیں رہنا صبح ہوئی تو رسول اللہ (صلی اللہ علیہ وآلہ وسلم) اپنی جائے نماز پر تشریف لائے اور دو رکعتیں ادا کیں پھر فرمایا : کیا تم نے اپنے شہسوار کو محسوس کیا ہے ؟ ایک شخص بولا : یا رسول اللہ ! ہم نے اسے محسوس نہیں کیا نماز کے لیے اقامت کہی گئی رسول اللہ (صلی اللہ علیہ وآلہ وسلم) نماز میں تھے اور آپ نے گھاٹی کی طرف دیکھنا شروع کردیا حتیٰ کہ جب آپ نماز سے فارغ ہوئے اور سلام پھیرا، ارشاد فرمایا : خوش ہوجاؤ تمہارے گھڑ سوار آچکے ہیں ہم گھاٹی میں درختوں کے سائے تلے دیکھنے لگے چنانچہ وہ سامنے سے آرہے تھے اور آتے ہی رسول اللہ (صلی اللہ علیہ وآلہ وسلم) کے پاس کھڑے ہوگئے اور عرض کیا : میں آپ کے پاس سے چل کر گھاٹی کے اوپر پہنچ گیا جہاں کا آپ نے مجھے حکم دیا تھا صبح کو جب سورج طلوع ہوا میں نے دائیں بائیں دیکھا مجھے کوئی نہ دکھائی دیا رسول اللہ (صلی اللہ علیہ وآلہ وسلم) نے ان سے فرمایا : کیا تم رات کو نیچے اترے تھے ؟ عرض کیا : نہیں البتہ نماز کے لیے اور قضائے حاجت کے لیے نیچے آیا ہوں رسول اللہ (صلی اللہ علیہ وآلہ وسلم) نے فرمایا : تم نے اپنے اوپر جنت واجب کردی اب تمہارے اوپر کوئی حرج نہیں کہ اس کے بعد کوئی عمل بھی نہ کرو۔ (رواہ ابو نعیم فی المعرفۃ)