Kanz al-Ummal: Hadith 38019

٣٨٠٠٧۔۔۔ شعبی سے روایت ہے کہ بنی اسد کی چھ عادتیں ایسی ہیں جو مجھے کسی عربی قبیلہ میں نظر نہیں آتیں، اللہ تعالیٰ نے اس قبیلہ کی ایک عورت سے اپنے نبی (رسول اللہ (صلی اللہ علیہ وآلہ وسلم)) کی شادی کرائی، دونوں کے درمیان سفیر جبرائیل امین تھے، اور اسلام میں سب سے پہلا جھنڈا عبدالرحمن بن جحش اسدی کے لیے باندھا گیا، اور پہلی غنیمت جو اسلام میں تقسیم کی گئی وہ عبداللہ بن جحش کی غنیمت تھی، اور ان میں سے ایک شخص جو جھک کر چلتا تھا اور جنتی ہے وہ عکاشہ بن محصن اسدی ہیں۔ اور سب سے پہلی بیعت ابوسنان عبداللہ بن وھب نے کی، وہ کہنے لگے : یا رسول اللہ ! اپنا ہاتھ بڑھائیے میں بیعت کرتا ہوں، آپ (صلی اللہ علیہ وآلہ وسلم) نے فرمایا : کس بات پر ؟ عرض کیا : جو آپ کے دل میں ہے، آپ نے فرمایا : میرے دل میں کیا ہے ؟ عرض کیا : فتح یا شہادت، آپ نے فرمایا : ہاں، چنانچہ آپ نے انھیں بیعت کیا، پھر لوگ بیعت کرنے لگے اور ساتھ ساتھ کہہ رہے تھے : ابوسنان کی بیعت کے مطابق، اور وہ سات مہاجر صحابہ (رض) تھے۔ (ابن عساکر وسندہ صحیح)