Kanz al-Ummal: Hadith 38191

٣٨١٧٩۔۔۔ زرعہ بن عمرومولی الخباب سے روایت ہے فرمایا : جب نبی (صلی اللہ علیہ وآلہ وسلم) مدینہ تشریف لائے آپ نے اپنے صحابہ (رض) سے فرمایا : ہمیں قباوالوں کے پاس لے چلو ! ہم انھیں سلام کرنا چاہتے ہیں، جب ان کے پاس پہنچے انھیں سلام کرکے فرمانے لگے : اہل قبا ! اس حرے سے میرے پاس پتھر لاؤ، چنانچہ آپ کے پاس پتھر جمع ہوگئے۔ اس کے بعد آپ نے ان کے قبلہ کی لکیر کھینچی، اور ایک پتھر لے کر لکیر پر رکھ دیا پھر فرمایا : ابوبکر ! پتھر لو اور اسے میرے پتھر کے ساتھ رکھ دو ، انھوں نے ایسا ہی کیا پھر ارشاد فرمایا : عمر ! پتھر لو اور اسے ابوبکر کے پتھر کے قریب رکھ دو ، انھوں نے ایسا ہی کیا، پھر فرمایا : عثمان ! پتھر لو اور اسے، عمر کے پتھر کے پاس رکھو، انھوں نے ایسا ہی کیا، اس کے بعد آپ لوگوں کی طرف آخر تک متوجہ ہو کے فرمانے لگے ہر شخص جہاں چاہے اس لکیر پر پتھر رکھ دے، اور ایک روایت میں ہے جو جہاں چاہے اس لکیر پر پتھر رکھ دے۔ (الدیلمی، ابن عساکر)