Kanz al-Ummal: Hadith 4541

4541:۔ ابی بن کعب (رض) سے مروی ہے کہ جب نبی اکرم (صلی اللہ علیہ وآلہ وسلم) اور آپ کے صحابہ کرام (رض) مدینہ ہجرت کرکے آئے اور انصار نے آپ لوگوں کو اپنے ہاں ٹھکانے دیے تو عرب نے سب کو (یعنی حضور (صلی اللہ علیہ وآلہ وسلم) اور مہاجروں کے ساتھ تمام انصار کو بھی) ایک ہی تیر کا نشانہ بنا لیا (اور سب مسلمان ان کی آنکھوں میں برابر کے دشمن ہوگئے) چنانچہ تمام مسلمان بھی رات دن اسلحہ سازی میں منہمک ہوگئے۔ (تم کیا سمجھتے ہو کہ مدینہ آ کر ہم) سکون کی زندگی بسر کرنے لگ گئے ؟ ہم لوگ اللہ ہی سے ڈرتے تھے۔ پھر اللہ پاک نے یہ فرمان نازل فرمایا :
وعد اللہ الذین آمنوا منکم و عملوا الصالحات لیستخلفنہم فی الارض۔ النور۔
اور اللہ نے وعدہ کیا ہے ان لوگوں کو جو ایمان لائے تم میں سے اور اچھے اعمال کیے کہ زمین میں ان کو خلافت دے گا۔ (ابن المنذر، الاوسط للطبرانی، مستدرک الحاکم، ابن مردویہ، الدلائل للبیہقی، السنن لسعید بن منصور)