Kanz al-Ummal: Hadith 8723

٨٧٢٣۔۔۔ حسن بصری سے روایت ہے فرمایا : عامر بن قیس کی جمامع مسجد میں ایک نشست تھی، ہم ان کے پاس جمع ہوتے ، کچھ دن ہم نے انھیں گم پایا تو ہم ان کے پاس چلے آئے (ہم نے کہا :) ابوعبید اللہ ! آپ اپنے ساتھیوں کو چھوڑ کر یہاں تنہا بیٹھ گئے ؟ انھوں نے فرمایا : اس مجلس میں بہت سی فضول اور ملی جلی باتیں ہوتی تھیں ، میں چند اصحاب رسول سے ملا ہوں، انھوں نے مجھے بتایا : کہ قیامت میں سب سے کمزور ایمان اس شخص کا ہوگا جس کا گوشت پوست دنیا میں زیادہ ہوگا انھوں نے مجھے بتایا کہ اللہ تعالیٰ نے کچھ چیزیں فرض کی ہیں اور کچھ سنت قرار دی ہیں ، اور کچھ حدود مقرری ہیں، سو جس نے اللہ تعالیٰ کے فرائض اور اس کے (بتائے) طریقوں پر عمل کیا، اور حددو اللہ سے بچتا رہا تو اللہ تعالیٰ اسے بغیر حساب جنت میں داخل کریں گے۔ اور جس نے اللہ تعالیٰ کے فرائض اور سنتوں پر عمل کیا (لیکن) اللہ تعالیٰ کی حدود کا مرتکب ہوا اور پھر توبہ کرلی (غلطی سے پھر) ارتکاب کیا، (لیکن پھر) توبہ کرلی پھر ارتکاب کیا اور توبہ کرلی، وہ قیامت کے روز کی ہول ناکیوں ، اس کے زلزلوں اور مصائب کا سامنا کرے گا پھر اللہ تعالیٰ اسے جنت میں داخل کریں گے۔
اور جس نے اللہ تعالیٰ کے فرائض وسنن پر عمل کیا اور اللہ تعالیٰ کی حدود کا مرتکب ہوا تو اللہ تعالیٰ اسے ایسی حالت میں ملے گا کہ اللہ تعالیٰ اس سے ناراض ہوں گے، چاہیں تو عذاب دیں اور چاہیں تو معاف کردیں، فرماتے ہیں : ہم اٹھ کھڑے ہوئے اور باہر نکل آئے۔ (ابن عساکر)