11362 ۔۔۔ حضرت مسروق سے مروی ہے فرمایا کہ حضرت عمر بن خطاب (رض) کے سامنے شہداء کا ذکر ہوا، تو حضرت عمر (رض) نے لوگوں سے دریافت فرمایا کہ تم شہید کسے سمجھتے ہو ؟ لوگوں نے عرض کیا، اے امیر المومنین ! وہ جو ان جنگوں میں قتل ہوتے ہیں، تو اسی وقت حضرت عمر (رض) نے فرمایا کہ اس طرح تو تمہارے شہید بہت کم ہوجائیں گے، میں تمہیں اس کے بارے میں بتاتا ہوں ، بیشک یہادری اور بزدلی دوفطری حالتیں ہیں جو لوگوں میں گاڑھی (ودیعت فرمائی) گئی ہیں، اللہ تعالیٰ جس کو چاہتا ہے جیسی چاہتا ہے عطا فرمایا دیتا ہے ، سو بہادر تو اس طرح جنگ لڑتا ہے کہ کوئی اس کو پروا نہیں ہوتی کہ وہ واپس اپنے گھر بھی پہنچ سکے گا یا نہیں اور بزدل تو اپنی بیوی سے بھی بھاگتا ہے ، لیکن شہید وہ ہے جو اپنے نفس کا احتساب کرے، اور مہاجر وہ ہے جو ان چیزوں کو چھوڑ دے جن سے اللہ تعالیٰ نے منع فرمایا ہے اور مسلمان وہ ہے جس کی زباں اور ہاتھ سے دوسرے مسلمان محفوظ رہیں “۔ (ابن ابی شیبہ)