11404 ۔۔۔ حضرت سعید بن المسیب سے مروی ہے فرمایا کہ جب حضرت ابوبکر صدیق (رض) نے شام کی طرف لشکر بھیجا تو بزید بن ابی سفیان ، عمرو بن العاص اور شرجیل بن حسنۃ (رض) جب سوار ہوگئے تو حضرت ابوبکر صدیق (رض) لشکر کے امراء کے ساتھ ساتھ ان کو رخصت کرنے کے لیے چلنے لگے اور ثنیۃ الوادع تک آپہنچے ، تو لوگوں نے عرض کیا، اے رسول اللہ (صلی اللہ علیہ وآلہ وسلم) کے خلیفہ ! آپ پیدل چل رہے ہیں اور ہم سوار ہیں ؟ فرمایا کہ میں اپنے ان قدموں کو اللہ کے راستے میں گن رہا ہوں ، پھر انھیں وصیت کرنے لگے سو فرمایا کہ میں تمہیں وصیت کرتا ہوں کہ اللہ سے ڈرتے رہنا، اور قتال کرو ان سے جو اللہ سے کفر کرے کیونکہ اللہ تعالیٰ اپنے دین کی مدد کرنے والے ہیں، اور مال غنیمت میں خیانت نہ کرنا غداری نہ کرنا، بزدلی نہ کرنا اور زمین میں فساد نہ کرنا اور جو تمہیں حکم دیا جائے اس میں نافرمانی نہ کرنا، اور جب مشرکین دشمنوں سے سامنا ہوجائے انشاء اللہ تو انھیں تین چیزوں کی دعوت دینا اگر وہ مثبت جواب دیں تو قبول کرلینا اور ان سے رک جانا اور (اس صورت میں) انھیں کفر کی سر زمین سے مسلمانوں کی سرزمین کی طرف ہجرت کرنے کا کہنا اگر وہ کرلیں تو ان کو بتانا کہ تمہارے لیے بھی وہی سہولتیں ہیں جو مہاجرین پر ہیں ، اور اگر وہ اسلام میں داخل ہوجائیں اور اپنے گھر بار چھوڑ کر مہاجرین کے علاقے میں آجائیں تو انھیں بتادو کہ ان کا حکم بھی دیگر عرب مسلمانوں کا سا ہے ان پر بھی اللہ کا حکم اسی طرح نافذ العمل ہوگا جو مومنوں پر ہے اور ان کے لیے مال فے اور مال غنیمت میں سے کوئی چیز نہ ہوگی یہاں تک کہ وہ مسلمانوں کے شانہ بشانہ مل کر جہاد کریں، اور اگر وہ اسلام قبول سے انکار کریں تو ان سے جزیہ طلب کرنا اگر وہ قبول کرلیں تو تم بھی قبول کرلینا اور ان سے اپنے ہاتھوں کو روک لینا اور اگر وہ انکار کریں تو ان کے خلاف اللہ سے مدد مانگو اور ان کے ساتھ قتال کرو انشاء اللہ ، اور کسی درخت کو نہ کاٹنا نہ جلانا اور کسی جانور کو نہ کاٹنا اور نہ کسی پھل دار درخت کو کاٹنا، کسی گرجے کو نہ گرانا بچوں کو قتل نہ کرنا اور نہ بزرگوں اور نہ عورتوں کو اور تم عنقریب ایسی قوم سے ملوگے جنہوں نے خود کو گرجوں میں بند کررکھا ہے سو ان کو اور ان کے خیالات کو چھوڑ دینا ، اور تمہیں ایک قوم ایسی بھی ملے گی جنہوں نے شیطان کے لیے اپنے سروں میں جگہ بنا رکھی ہے جب ایسے لوگ تمہیں ملیں تو ان کی گردنیں اڑادو انشاء اللہ “۔ (سنن کبری بیھقی)