11526 ۔۔۔ حضرت علی (رض) فرماتے ہیں کہ فاطمہ ، عباس اور زید بن حارثہ (رض) جناب رسول اللہ (صلی اللہ علیہ وآلہ وسلم) کی خدمت اقدس میں بیٹھے تھے تو حضرت عباس (رض) نے عرض کیا کہ یارسول اللہ ! میری عمر بڑھ گئی، ہڈیاں نرم ہوگئیں اور تکلیف بڑھ گئی سو اگر آپ مناسب سمجھیں تو میرے لیے اتنے وسق کھانے (بطور وظیفہ) کا حکم دے دیجئے، تو آپ (صلی اللہ علیہ وآلہ وسلم) نے فرمایا کہ میں نے حکم دے دیا ، پھر حضرت فاطمہ (رض) نے عرض کیا کہ یارسول اللہ ! اگر مناسب سمجھیں تو میرے لیے بھی ویسا ہی حکم فرمایئے جیسا اپنے چچا حضرت عباس (رض) کے لیے جاری فرمایا ہے کہ آپ (صلی اللہ علیہ وآلہ وسلم) نے فرمایا کہ میں یہ حکم جاری کردوں گا، پھر حضرت زید بن حارثہ (رض) نے عرض کیا کہ یا رسول اللہ ! آپ نے مجھے زمین مرحمت فرمائی تھی، میرا گزراوقات اسی سے تھا پھر آپ نے وہ زمین مجھ سے واپس لے لی سو اب اگر مناسب سمجھیں تو واپس کردیں ، تو آپ (صلی اللہ علیہ وآلہ وسلم) نے فرمایا کہ ایسا ہی ہوگا، پھر میں نے عرض کیا کہ یارسول اللہ ! اگر آپ چاہیں تو اس حق پر مجھے مقرر فرمادیئے تو اللہ تعالیٰ نے اپنی کتاب میں ہمارے لیے مقرر فرمایا ہے یعنی خمس ، تو میں اس کو آنجناب کی حیات مبارکہ ہی میں تقسیم کردوں گا تاکہ آپ کے بعد کوئی مجھ سے اس معاملے میں جھگڑا نہ کرے، تو آپ (صلی اللہ علیہ وآلہ وسلم) نے فرمایا کہ ہم ایسا کردیں گے چنانچہ آپ (صلی اللہ علیہ وآلہ وسلم) نے مجھے اس پر مقرر فرمادیا اور میں نے آپ صلی اللہ علیہ کی حیات مبارکہ ہی میں اس کو تقسیم کردیا ، پھر حضرت ابوبکر صدیق (رض) نے مجھے مقرر فرمایا اور میں نے اسے ان کی حیات مبارکہ ہی میں تقسیم کردیا، پھر مجھے حضرت عمر (رض) نے اس پر مقرر فرمایا اور میں نے ان کی حیات مبارکہ میں ہی اسے تقسیم کردیا “۔ (ابن ابی شیبہ، مسند احمد، ابوداؤد، ابویعلی ، الضعفاء، للعقیلی متفق علیہ، سعید بن منصور اور مسلم)