11649 ۔۔۔ حضرت ابوہریرہ (رض) فرماتے ہیں کہ میں حضرت ابوموسیٰ اشعری (رض) کے پاس سے حضرت عمر (رض) کی خدمت میں آٹھ لاکھ درھم لے کر پہنچاتو آپ (رض) دریافت فرمایا کہ کیا لے کر آئے ہو، میں نے عرض کیا کہ آٹھ لاکھ دینار لایا ہوں فرمایا کہ تم اسی ہزار ہی لائے ہوگے میں نے عرض کیا کہ نہیں بلکہ میں آٹھ لاکھ دینار لایاہوں فرمایا کہ تم سے کہا نہیں تھا کہ تم یمن کے بےعقل ہو ؟ تم اسی ہزار لائے ہو اچھا بتاؤ آٹھ لاکھ کتنے ہوتے ہیں ؟ سو میں نے ایک ایک لاکھ کرکے گنا یہاں تک کہ آٹھ لاکھ پورے گنے، پھر فرمایا کہ کیا یہ پاکیزہ مال ہے تو پریشان ہو ! میں نے عرض کیا جی ہاں سو حضرت عمر (رض) نے وہ رات بےچینی سے گزاری یہاں تک کہ جب فجر کی اذان ہوئی تو ان سے ان کی اھلیہ نے کہا کہ آپ رات بھر نہیں سوئے ؟ فرمایا کہ عمر بن خطاب کیسے سو جائے جبکہ اتنے لوگ آگئے ہیں جو آغاز اسلام سے اب تک اتنے نہیں آئے، اگر عمر ہلاک ہوگیا تو کون بچائے گا ؟ اور وہ مال بھی اس کے پاس ہو اور حق دار کو بھی نہ دیاہو ؟ سو جب آپ (رض) فجر کی نماز ادا فرماچکے تو سول اللہ کے صحابہ کرام (رض) کا ایک گروہ آپ کے پاس جمع ہوگیا، تو آپ (رض) فرمایا کہ آج رات لوگوں کے پاس اتنامال آیا ہے کہ آغاز اسلام سے پہلے آج تک اتنامال نہیں آیا، سو میری اس معاملے میں رائے ہے تم بھی مجھے مشورہ دو ، میرا خیال ہے کے لوگوں کو پیمانے بھر بھر کردوں، عرض کیا کہ اے امیرالمومنین ایسا نہ کریں لوگ اسلام میں داخل ہورہے ہیں اور مال بڑھتا جارہا ہے، بلکہ ان کو آپ کتاب اللہ کے مطابق دیجئے سو جب کبھی لوگ زیادہ ہوں اور مال بھی زیادہ ہو تو آپ انھیں اسی طریقے سے وظائف دے سکیں گے۔ پھر فرمایا کہ اچھا مجھے یہ مشورہ دو کہ میں پہلے کس سے شروع کروں ؟ صحابہ کرام (رض) نے عرض کیا یا امیرالمومنین آپ اپنے آپ سے شروع کیجئے آپ ہی اس معاملے کے نگران ہیں اور انہی میں سے کسی نے کہا کہ اور امیرالمومنین زیادہ جانتے ہیں، فرمایا نہیں بلکہ میں جناب نبی کریم (صلی اللہ علیہ وآلہ وسلم) سے شروع کرتا ہوں اور پھر جو زیادہ قریب ہو درجہ بدرجہ چنانچہ اسی کے مطابق فہرست تیار کی گئی بنوھاشم اور بنوعبدالمطلب سے شروع کیا گیا اور ان سب کو دیا گیا پھر بنوعبدشمس کو دیا گیا ، پھر بن نوفل بن عبدمناف کو دیا گیا اور بنوعبدشمس کو شروع میں اس لیے رکھا تھا کیونکہ وہ بنوھاشمی کے ماں شریک بھائی تھے۔ (ابن سعد، سنن کبری بیھقی)