11653 ۔۔۔ جبربن الحویرث فرماتے ہیں کہ حضرت عمر (رض) نے فہرستیں بنانے کے سلسلے میں مسلمانوں سے مشورہ کیا، حضرت علی (رض) نے فرمایا کہ جو مال سال بھر میں آپ کے پاس جمع ہو وہ آپ ساراکاسارا تقسیم کردیں اور اس میں سے کچھ نہ رکھیں ، حضرت عثمان (رض) نے فرمایا کہ میرا خیال ہے کہ مال بہت زیادہ ہے لوگوں کے لیے کافی ہے اگرچہ ان کو گنانہ جائے تاکہ آپ لینے والوں اور نہ لینے والوں کو الگ الگ پہچان لیں کہیں ایسانہ ہو کہ معاملہ الجھ جائے، ولیدبن ہشام بن مغیرۃ (رض) نے فرمایا کہ اے امیرالمومنین میں شام سے ہو کر آیا ہوں انھوں نے الگ الگ فہرستیں اور الگ الگ لشکر بنا رکھے ہیں سو آپ بھی الگ الگ فہرستیں اور الگ الگ لشکر بنا کر رکھیں حضرت عمر (رض) نے اس مشورہ کو قبول کرلیا اور عقیل بن ابی طالب محزمہ بن نوفل اور جبیر بن مطعم (رض) کو بلایا ؟ یہ لوگ قریش کے نسب ناموں کے ماہر تھے، ان کو حکم فرمایا کہ لوگوں کے نام ان کے درجات کے مطابق تحریر کریں ، چنانچہ انھوں نے لکھے اور بنوھاشم سے شروع کئے اور پھر حضرت ابوبکر (رض) اور ان کی قوم کا نام لکھا اور پھر حضرت عمر (رض) اور ان کی قوم کا نام لکھا خلافت کا لحاظ کرتے ہوئے جب حضرت عمر (رض) نے دیکھا تو فرمایا کہ خدا کی قسم میرا بھی یہی دل چاہتا ہے ایساہی ہو لیکن نبی کریم (صلی اللہ علیہ وآلہ وسلم) کے قریبی رشتہ داروں سے شروع کرو اور درجہ بدرجہ لکھتے جاؤ اور عمرکو وہاں رکھوجہاں اللہ نے رکھا ہے “۔ (ابن سعد)